Hêrişê Afganîstanî de 11 tutî ameyî kiştiş

2026-06-10 14:34:27


	 

	MERKEZÊ XEBERAN - Talîbanî va ke netîceya hêrişanê hewayî yê artêşa Pakistanî de, xeylê înan tutî 13 sivîlî ameyî kiştiş.

	 

	Hukmatê Talîbanî yê Afganistanî neql kerd ke artêşa Pakistanî şewa sêşeme cayê sivîlanê bajarê Kunarî, Hostî û Paktikayî bombardiman kerdî.

	 

	Verfekê hukmatê Talîbanî Zabihullah Mucahîd Xî ser de eşkerayîyêk da û dîyar kerd ke Pakistan de wareyê hewayî yê Afganistanî binpay kerd û va ke netîceya hêrîşî de 11 tutî, yew cinî û yew extîyarêk ameyî kiştiş. Verfekî sewbîna dîyar kerd ke 14 cinî û tutî zî birîndar bîyî û fotografê sivîlanê ke ameyî qetilkerdiş pare kerdî.

	 

	Mucahîdî îfade kerd ke wareyê ke ameyî hedefgirewtiş cayê sivîlan ê û hêrîşî manaya binpaykerdişê huqûqê mîyanneteweyî danê.

	 

	Selahîyetdarêk bajarê Hostî AFPyî rê dîyar kerd ke netîceya hêrîşêk hewayî yê ser keyeyêk qezaya Sperayî de 9 kesî dinyaya xo bedelnayî û 10 kes zî birîndar bîyî.

	 

	Çimeyêk herêmî zî neql kerd ke hêrîşêk bajarê Paktikayî ser o 3 kesî dinyaya xo bedelnayî.

	 

	Artêşa Pakistanî persanê AFPyî yê girêdayeyê mesele de cewab nêda û hema derheqê hêrişan eşkerayîyêka fermî nêdayî.

	 

	Hêrişanê peyêne ra dima aramîya xeta sînorê Afganistan-Pakistanî ser o pê ameyî. Şer û pêrodayîşanê ke aşmanê verênan de mîyanê her di welatan de, peynîya sibata de vurîyabî şerêk eşkere û xeta sînorî bî sebebê vînîbîyayîşî pîlî.

	 

	Goreyê raporê Neteweyê Yewbîyayeyan (NY) yê aşma gulane ke ame weşankerdiş, şerê mîyanê 1ê çeleyî û 31ê adarî de tewr tay 372 sivîlê Afganistanî ameyî kiştiş.