Cinîyê dinya wazenê Abdullah Ocalanî dir pêvînayîş bikerê

2026-05-25 09:08:04


	 

	AMED - Aktîvîsta TJA’yî Harîka Peker proses erjna û va seba serkewtişê prosesî ganî azadîya Abdullah Ocalanî pê bêro, statuyê qanûnî bêro şinasnayîş. Harîka Peker va cinîyê dinya wazenê Rayberê Şarê Kurd Abdullah Ocalanî dir pêvînayîş bikerê û ganî berrê Îmralîyî bêrê akerdene.

	 

	Rayberê Şarê Kurd Abdullah Ocalanî 27’ê Sibate de venga ‘Aştî û Cimatê Demokratîk’ kerd û prosesî ser ra serrêke ra zêde vîyart. Nê demanê peyênan de erjnayîşê ke vanê proses xitîmîyayo bêrê kerdene zî, munaqeşeyê statuyî dewam kenê. Cinîyê dinya wazenê perspektîfê cinîyan ê Rayberê Şarê Kurd Abdullah Ocalanî, vatişê ey ê derheqê cinîyan de pîya munaqeşe bikerê. Aktîvîsteya Têgêrayîşê Cinîyanê Azadan (TJA) ra Harîka Peker derheqê babete de qisey kerd.

	 

	‘Nêgirewtişê gaman prosesî xitimneno’

	 

	Harîka Peker derheqê prosesî de qisey kerd û da zanayîş ke serrêke û nîm verê cû proses hetê Rayberê Şarê Kurd Abdullah Ocalanî ra ameyo destpêkerdene û va: “Nê prosesî de zafê averşîyayîşî ameyî ciwîyayîş. PKK’yî xo fesh kerd û çekî ameyî îmhakerdene. Labelê averşîyayîşî yewhetî bîyî. Dewlete game nêeşte. Komîsyon ame awankerdiş, rapor ame amadekerdene û netîceya ci ameye vilakerdiş. Derheqê raporî de sererastkerdişêk nêame kerdene. No zî bêbawerîye afirneno. Beno semedê xitimandina prosesî. Her xitimandine de Birêz Ocalan rayîrî akeno. Hukmat her rey vatişî ano serê ronayîşê çekan. Hukmat xo giran keno. Zerarêko pîl dano prosesî. Seba ke rojnamegerî, hetê cîyayî, muxalîfî, sazgehê cimatê sivîlî, cinîyî û ciwanî pêvînayîş bikerê, ganî zemînêko weş bêro awankerdiş.”

	 

	Zafê hetan ra waştişê pêvînayîşî esto

	 

	Harîka Peker destnîşan kerd ke bi destpêkerdişê prosesî re her hetî ra waştişê pêvînayîşî esto û wina dewam kerd: “No pêvînayîş do seba fehmkerdişê prosesî û çareserkerdişê problemê Kurdî bitesîr bo. Pêvînayîşê ke heta nika kerdî kemî bîyî. Sewîyeya ke dewlete waştêne de pê ame. Ganî şar bi Birêz Ocalanî re raste rast bêro têhet, pêwa rayapêroyî re vila bikerê do hîna pîl bêro fehmkerdene. Hema tu rojnameger nêşîyo Îmralî. Ma sey cinîyan, binê banê TJA’yî de waştişê pêvînayîşî kenê.”

	 

	‘Paradîgmayê Birêz Ocalanî vera hêrişan cewab o’

	 

	Harîka Peker ard ziwan ke tecrîdêko 27 serrî yo ke dewam keno esto û wina va: “Cinîyan vera tecrîdî çalakîye, kampanya û xebatî rayra berdî. Me hewl da em paradîgmayê azadîya cinîyan ê Birêz Ocalanî fehm bikerê û bidê fehmkerdene. Perspektîfê cinîyan ê Birêz Ocalanî vera hêrişan cewabêko pîl o. Vera cinîyan de her tewrê şîdetî esto. No paradîgma zirxê pawitişî yo.”

	 

	‘Şinasnayîşê statuyî şinasnayîşê proses û şaran o’

	 

	Harîka Peker destnîşan kerd ke şinasnayîşê statuyê Abdullah Ocalanî tîno manaya şinasnayîşê şaran û prosesî û wina dewam kerd: “Labelê îqtîdar hewl dano rewşa xo ya bîyaye bîdomno. No nêzdîbîyayîş nêrast o. Eke prosesêko bêro domnayîş, ganî statuyê huqûqî û qanûnî yê Birêz Ocalanî bêro şinasnayîş. Ma şinasnayîşê statuyê Birêz Ocalanî sey statuyê şaran vînenê. Ma prosesî pêroyî û mîyanê yewbînan de gênê dest. Sey TJA’yî xebatê ma yê derheqê prosesî de dewam kenê. Zafê cayanê dinya de bi rêxistinanê cinîyan re xebatê ma yê dîplomatîkî est ê.”