Hondurasî ra vengdayîş: Heqê hêvîye pê bîyarê

2026-05-22 13:37:20


	 

	MERKEZÊ XEBERAN - Rêxistina COPINH’î ya ke herêma Hondurasî de şarê Lenca temsîl kena, Serekê Komîteya Wezîran a Konseya Ewropa rê mektubêk erşawit. Mektubî de ame waştene ke tecrîdê serê Rayberê Şarê Kurdî Abdullah Ocalanî bêro hewanayîş û “heqê hêvî” bêro caardene.

	 

	Rêxistina COPINH’î ya ke Honduras de şarê Lenca temsîl kena, mektubî de ke erşawit Serekê Komîteya Wezîran a Konseya Ewropa (KWKE) de waşt ke tecrîdê serê Rayberê Şarê Kurdî Abdullah Ocalanî bêro hwanayene û “heqê hêvî” bêro caardene. Mektubî de ame dîyarkerdene ke Rayberê Şarê Kurdî Abdullah Ocalan prosesê aştî û çareserîya demokratîk de muhatabêko sîyasî yo bingeyîn o.

	 

	Muhtewayê mektubî wina yo:

	 

	Mektubî de ke hetê rêxistina COPINH’î ra ameyo erşawitene ame vatene ke rêxistina COPINH’î hîris serrî ra vêşêr o ke seba pawitişê dewe, herême, herre û heqanê kolektîfî yê şaranê herêmî bêveng nêmanena û xebatan organîze kena.  Mektubî de ame dîyarkerdiş ke demokrasîyêko rasteqîne tena bi garantîkerdiş û pawitişê heqanê bingeyînan û îradeyê sîyasî yê şaran mumkin beno.

	 

	Mektubî de koordînatora COPINH’î û aktîvîsta derûdorî Berta Caceres zî ameya vîrardiş ke a serra 2016î de seba pawitişê heqanê şarê herêmî ameya kiştiş û ame vatene ke rêxistine vera heme tewir tedayan zî xebatanê xo bêmabên domnena.

	 

	Mektubî de ame dîyarkerdene ke derheqê canêardişê qerarê Mehkemaya Heqanê Merdiman a Ewropa (MHME) yo ke serra 2014î de dewaya Rayberê Şarê Kurdî Abdullah Ocalanî de dabi, endîşeyêka pîle est a. Taybetî nasnêkerdişê “heqê hêvî” sey binpaykerdişê îxlalê heqanê merdiman ê mîyanneteweyî ame dîyarkerdiş.

	 

	Mektubî de ame vatene ke na rewşe tena problemêko huqûqî nîya, na eynî wextî de vernîya awankerdişê aştîyêka adîl û demokratîk de zî astengîyêka giran virazena.

	 

	COPINHî mektubê xo de dîyar kerd ke Rayberê Şarê Kurdî Abdullah Ocalan munaqeşayanê aştî û çareserîya demokratîk de ke Kurdîstan û Tirkîya de yenê kerdene muxatabanê sîyasî yê bingeyînan ra yew o.

	 

	Ame vatene ke dewamkerdişê şertanê giran ê tecrîdî û binpaykerdişê heqan ê serê Rayberê Şarê Kurdî Abdullah Ocalanî; îmkananê dîyalog, pêameyîş û bedilîyayîşê sîyasî zeîf keno.

	 

	Vengdayîşo 3 madeyîn seba Konseya Ewropa

	 

	COPINH’î seba Komîteya Wezîran a Konseya Ewropa nê vengdayîşî kerdî:

	 

	Qerarê Mehkemaya Heqanê Merdiman a Ewropa ya serra 2014î bi şeklêlo tesîrdar bêro caardene û “heqê hêvî” bi temamî bêro naskerdene,

	 

	Vera Tirkîya tedayê sîyasî bêrê zêdekerdene û prosedurê îxlalî zî tede, mekanîzmayê kontrolî bêrê xebitnayene,

	 

	Ganî vernîya Abdullah Ocalanî bêra akerdiş ke o bi hawayêko azad beşdarê xebatanê awankerdişê aştî bibo.

	 

	Peynîya mektubî de ame dîyarkerdiş ke şarê Lenca vera şîdet û talanî pawitişê ganî domneno û wina ame vatene: “Ma bi heme şaranê ke seba edalet, rûmet, demokrasî û aştî xebatan organîze kenê, înan reyde mîyanê piştgîrî de yê.”