‘Hewce bi demokrasî est o’

2026-05-22 10:42:29


	 

	Elfazî Toral

	 

	STENBOL - Siyasetmedare Dîba Keskîn ke yew kesa ke venga ‘Konferansê Vurnayîşê Komara Demokratîk’ kerda, da zanayîş ke hewcedarîya Tirkiya bi modelê demokrasiyê zafveng û zafnasnameyî est a. Dîba Keskîn ard ziwan ke do komara demokratîke bi rihê yewîye awan bikerê.

	 

	Zafê siyasetmedar, roşnvîr, hunermend û akademîsyenî do 13 û 14ê Hezîrane de Stenbol de konferansê bi nameyê "Seserra Diyîne de Konferansê Vurnayîşê Komere ya Demokratîke” organîze bikero. Kesê ke binê nê vengdayîşî de îmzayê înan est ê, yew hotela qezaya Beyoglûyî ya Stenbolî de bi eşkerayîyêke venga tewrbîyayîşê konferansî kerdî. Konferans do 13-14ê Hezîrane de Bakirkoyê Stenbolî de, Merkezê Kulturî yê Cem Karaca de pê bêro.

	 

	Siyasetmedare Dîba Keskîn derheqê konferansî de qisey kerd.

	 

	Dîba Keskîn hêrişê Îsraîlî yê vera Hamas û Xazeyî ardî vîr û va ke Rojhelatê Mîyanênî de zafê sîstemî bedilîyayê û şerê DYA, Îsraîl û Îranî pîya giredîyayê û wina va: “Yew dewleta ke bi zext û qirkerdiş têgêrayîş keno nêbedilîyena. Ganî cimat mîyanê xo de vurnayîş bikero. Cimat mîyanê xo de vurnayîş bikero do cuye xo zî neqş bikero. Bi zext û şîdet vurnayîş bibo, cuye zî goreyê polîtîkayanê xo awan keno. Ma Tirkiya de aramiya şaran wazenê. Hewcedarîya Tirkiya bi sîstemê demokrasiyî est a. Tirkiya de her şar bi veng, ziwan û rengê xo wazeno bîciwîyo.”

	 

	Xeta demokrasiyê cimatî

	 

	Dîba Keskîn dîqet ant serê Konferansê Vurnayîşê Demokratîk û va ke aştî û demokrasî bi xeta têkoşînî ke her kes rayra beno eşkeno mumkin bo û wina va: “Wa kes xo tenê hîs nêkero. Ganî her kes têhet bo. Ganî her kes bi bawerî û îradeyê xo têkoşînê demokrasiyî de bibo wayîrê berpirsîyarîye. Aştîya cimatî bi xeta têkoşînê hemparî mumkin a. Armancê konferansê ma zî awankerdişê sîstemê komara demokratîke yo. No vengdayîşê ma zî seba şaranê Tirkiya yo. Her hetî ra kesî vengdayîşê konferansî de ca gênê. Ganî ma tifaq awan bikerê. Serê cimatî de zextê pîlî est ê. Zext û şîdet roj bi roje yenê meşrûkerdiş.”

	 

	Venga yewîye

	 

	Dîba Keskîn seba tewrbîyayîşê konferansî zî wina veng da: “Ganî ma vengê xo her kuçe de, her taxe de, her ca de biresnê şaran. Ma çiqas bibê yew, ma bi rihê yewîye têgêrayîş bikerê, ma têkoşînê xo zî hende pîl bikerê û bawerîya bi aştî, demokrasî û azadîye zî xurt bikerê.”