Sevda Çelîk Ozbîngol: Ganî sererastkerdişê qanûnî lezkî bêrê kerdiş 2026-05-15 09:29:27   Gulîstan Gulmuş   RIHA - Hemverfeka Komîsyonê Huqûqî ya DEM Partî Sevda Çelîk Ozbîngole derheqê sererastkerdişê qanûnîyan ê dimayê eşkerayîya ke Têgêrayîşê Apoyî daya de qisey kerd û va: “Huqûq bêro ca û huqûqê aştîye bêro ca o wext bawerî awan bibo. Ganî meclîs bikewo dewr, sererastkerdişê qanûnîyan lezkî bîyaro ca û zemînî awan bikero.”   Rayberê Şarê Kurd Abdullah Ocalanî 27ê Sibata 2025ine de vengdayîşê ‘Aştî û Cimatê Demokratîk’ kerd û nê prosesî de Abdullah Ocalan û rêxistine xeylê gamî eştî û veng dayî. DEM Partî partîyanê Tirkiya reyde çar parçeyê Kurdistanî de bi sîyasetmedaran reyde pêvînayîşî kerdî. Dayîkanê Aştîye seba ke gamê qanûnî bêrê eştene çalakî viraştî. Devlet Bahçelî dem bi dem qiseyê pozîtîfî vajo zî, kîşta dewlete ra gamî nêameyî eştene. Têgêrayîşê Apoyî bi nameyê xo yê verênî PKK ke xo fesh kerdbi, gamêke eşt û serrgêra yewîne ya feshkerdişî de eşkerayîyêk da û veng da ke ganî dewlete gamê somutî bierzo.   Hemverfeka Komîsyonê Huqûqî ya DEM Partî Sevda Çelîk Ozbîngole derheqê vengdayîşê 27ê Sibate, helwestê dewlete, gamê ke ganî bêrê eştene û sererastkerdişê qanûnîyan de qisey kerd.   ‘Sere de asayîşê huqûqî hewce yo’   Sevda Çelîk Ozbîngole derheqê prosesê ke serrêke yo dewam keno de qisey kerd û qiseyê Devlet Bahçelî yê ‘proses yew hetî nêşîyeno’ ard vîr û wina dewam kerd: “No proses yew hetî nêşîyeno. Aştî zemînêk huqûqî yê bawerîye de mumkin a. Eksê nê proses zirar vîneno û bawerîya cimatî vîndî bena. No êdî yeno vînayîş. Caardişê qeyûmî, problemê înfazê cezayî, xeylê problemê bînî. Nê problemî hewceyê înan bi sererastkerdişê qanûnî est o. Sere de gamê ke ganî hetê dewlete ra bêrê eştene asayîşê huqûqî yo. Eşkera û zelal ganî çarçeweya qanûnî bêra awankerdiş.”   Gamê ke ganî bêrê eştene rêz kerdî   Sevda Çelîk Ozbîngole, madeyê derheqê asayîşê huqûqî yê ferzî ke ganî bikewê cuye wina rêz kerdî:    Meclîs de ganî sererastkerdişê qanûnî yê taybetî bêro kerdene.    Ganî reformê ke azadîya fikr-vîr û rêxistinbîyayîşî kenê binê asayîşî, bikewê cuye.    Ganî caardişanê qeyûmî peynî bîyarê û demokrasîyê herêmî bêra radestkerdiş.    Ganî tepişteyê sîyasîyî bêrê veradayîş.   “Bê zemînê huqûqî çareyêko mende mumkin nîyo. Bêguman sererastkerdiş bi gamêke nêbeno, ma behsê prosesêko demderg kenê. Ganî hîmê nê prosesî saxlem bêro eştene. Ganî asayîşê qanûnî bibo.”   Sevda Çelîk Ozbîngole dîyar kerd ke ganî statuya Rayberê Şarê Kurd Abdullah Ocalanî ke muxatabê esasî yê prosesî yo, sererastkerdişê qanûnîyan reyde bêra destgirewtene û va: “Babeta statu sernameyê tewr krîtîkanê prosesî ra yew a. Ganî şert û mercanê azadan de muzakere bêro domnayîş. Ganî heqê hêvîye bêro ca. Seba ke proses bi hawayêko baş şêro, ganî kanalê têkilîye bêrê akerdiş, statuya huqûqî zelal biba. Ganî proses zemînêko fermî de bêro roniştene.”