‘Tutî benê mexdurê sîstemî’  

2026-05-15 09:10:32


	 

	ANQARA - Avûkata Komeleya Ewilî Cinî û Tutî Hedîye Gokçe Baykale dîyar kerd ke ganî mekanîzmayê ke tutan kena merkezê xo bêra awankerdiş û va: “Hewce bi awankerdişê komîsyonêk çin o. Sazîyanê ke est ê de sererastkerdişî eşkenê bêrê kerdene. Ganî lezkî sererastkerdişê ke verê sucî gênê bêrê kerdene.” 

	 

	Polîtîkayê hukmatî yê ke heme cimatî gênê xo mîyan, feqîrî û şîdetî zî pîl kenê. Sebebê esasî yê ke tutan ver bi sucî benê, sîstemê musayîşî yo ke nêronîyayo û çareyê hukmatî yê seba karkerîya tutan û şîdetî zî qedexeyê çapemenîya dîjîtale yo. 

	 

	Komeleya Ewilî Cinî û Tutan ra avûkate Hedîye Gokçe Baykale derheqê babete de qisey kerd û da zanayene ke nê hedîseyî munferît nîyê û va tutî mexdurê sîstemî yê.

	 

	Hedîye Gokçe Baykale eşkera kerd ke nê hedîseyî munferît nîyê û va: “Cimat de şîdetêkê zafhetî est o. Hema vizêr embaza ma ya avûkate ameye qetilkerdiş. Şîdetê zerrê keyeyî, şîdetê dîjîtale û yên bînî ganî heme pîya bêrê erjnayîş. Bi tena serê xo erjnayîşê hedîse kemî maneno. Bi hawayêko munferît erjnayîş merdiman nêbeno netîceya raşte.” 

	 

	‘Ganî çimeyê problemî bêro tespîtkerdiş’ 

	 

	Hedîye Gokçe Baykale dewamê qiseykerdişê xo de va komîsyonê ke binê banê meclîsî de ameyî awankerdiş, xeylê dima hedîseyanê ke ameyî ciwîyayene ameyî awankerdiş û wina dewam kerd: “Hedîseyêka munferîte yena ciwîyayene, dimayê ci komîsyon yeno awankerdiş. Ganî nê komîsyonî tutan bigîrê merkezê xo. Çareyê hedîseyanê munferîtan bêguman mûhîm o. Labelê ey ra dima ganî polîtîkayê ke verê ci gênê bêrê awankerdiş. Ma nêşkenê vajê ke nê komîsyonî bes ê. Ganî çimeyê probleman bêro tespîtkerdiş, çare bêro afirnayîş.”

	 

	‘Gumanbarî sucî ra pîlêr mexdurê sîstemî yê’ 

	 

	Hedîye Gokçe Baykale dewamê qiseykerdişê xo de va wexto ke tut raste rast cuya musayîşî ra bêro antiş û bikewo cuya karî, na yena manaya feqîrîye û wina ard ziwan: “Tutê ke ganî şêrê mekteb, kewenê sîstemê karî. Benê qurbanê ekonomîye. Seba nê zî feqîrîyêka giran est a. Tutî esas de gumanbaranê sucî ra pîlêr mexdurê sîstemî yê. Muracatê rayîranê bînan kenê. Sucê dizdîye zaf bîyî. Tutî ver bi sucî yenê berdene. Bitaybetî zî tutê ke musayîşî ra dûrî kewenê, ver bi sucî yenê berdene û tewrê sucî yenê kerdene.”

	 

	Hedîye Gokçe Baykale peynîya qiseykerdişê xo de wina va: “Hewce bi awankerdişê komîsyonêk çin o. Sazîyanê ke est ê de sererastkerdişî eşkenê bêrê kerdene. Ganî lezkî sererastkerdişê ke verê sucî gênê bêrê kerdene.”