Hemverê caardişê tiryakî de têkoşînê hempar 2026-05-09 11:51:57   AMED - Şaredarîya Amedî ya Bajarê Girdî, bi armancê awankerdişê hişmendîya cimatî û averşîyayîşê pêşnîyazanê çareserîye yê serê tiryakîye, beşdarê “Atolyeya Tiryakîye û Têkoşînê vera Tiryakîye” bîye ke bi hetkarîya Zanîngehê Dîcleyî ameye viraştene.   Sereka Daîreya Xizmetanê Cimatî, çarçewaya xebatanê pawitiş û vernîgirewtişî de, semedê têkoşînê vera tiryakîya madeyan bi beşê cîya-cîyayan ê cimatî reyde yena têhet. Na çarçewa de, psîkologê Midûrîya Şubeyê Hetkarîya Cimatî û personelê Merkezê Şêwirmendî û Perwerdeyê Tiryakîya Madeyan, bi hawayêko aktîf beşdarê roniştiş û atolyeyanê Zanîngehê Dîcle bîyî.   Tiryakîye bi heme hetan ra ameye erjnayîş   Atolyeya ke di rojan domnaye de, meseleya tiryakîye bi hîrayî ameye erjnayîş. Her di rojan de serê babetê sey vernîgirewtişê tiryakîye, metodê destveradayîşê rewî, prosesê dermankerdişî û xebatê rehabîlîtasyonî de fikr û fehmî ameyî parekerdiş.   Roniştişî ke bi beşdarîya pisporan ameyî viraştene, semedê tîpanê cîyayan ê tiryakîye pêşnîyazî ameyî averşîyayîş. Bi taybetî bale  serê mûhîmîya hetkarîya mîyanê saziyan ameye antiş. Ame dîyarkerdiş ke nêzdîbîyayîşê cimatparêzî do têkoşînê vera tiryakîye de netîceyanê bi tesîrêr bidê.   Armanc: Modelê têkoşînî yê domdarî   Ame destnîşankerdiş ke goreyê erjnayîş û pêşnîyazanê ke netîceyê atolyeye de vejîyayê orte, yeno armanckerdiş ke têkoşînê vera tiryakîye de caardişê bi tesîrêr û domdarî bêrê averşîyayîş.