Gulistan Gulo: Ganî bîyayîşê ma destûrê newe de bêro qebûlkerdiş 2026-05-08 09:12:46   Jiyan Gencan   QAMIŞLO - Endama Koordînasyonê Kongra Star Gulistan Gulo dîyar kerd ke hukmatê demkî yê Sûrîye YPJ qebûl nêkeno û va: “Hukmatê demkî tena YPJ nê, bi tu hawayî bîyayîşê cinîyan qebûl nêkeno. Ma zî bi israr wazenê ke bîyayîş û nasnameyê ma destûrê newe yê Sûrîye de bêro qebûlkerdiş.”   Çarçewaya peymana 29ê Çeleyî ya mîyanê QSD û hukmatê demkî yê Sûrîye de munaqeşeyê entegrasyonî dewam kenê. Mîyanê entegrasyonî de zî madeyo tewr mûhîm ke hema zî nêzelal mendo, Yewîneyê Pawitişê Cinîyan (YPJ) o. Hukmatê demkî qebûl nêkeno ke YPJ mîyanê artêşa Sûrîye de ca bigîro. Vera nê qerarî de reaksîyonê cinîyan est ê. Platformê Çalakîyê Hembeş ê Têgerayîş û Rêxistinanê Cinîyan ê Rojava, vera nê qerarî de 26ê Nîsane de bi sloganê “Ma Heme YPJ yê, YPJ Bîyayîşê Ma yo” kampanya da destpêkerdiş.   Çarçewaya kampanyaya paştîdayîşî de Endama Koordînasyonê Kongra Star Gulistan Gulo ajansê ma re qisey kerd.   ‘Mîyanê munaqeşeyanê entegrasyonî de bîyayîşê YPJ nîno qebûlkerdiş’   Gulistane Gulo destpêkê qiseykerdişê xo de semedê armancê kampanyaya paştîdayîşê YPJ’yî va: “Ma 26ê Nîsane de semedê YPJ kampanyaya paştîdayîşî da destpêkerdiş. Armancê ma no yo ke bîyayîşê YPJ mîyanê artêşa Sûrîye de bêra qebûlkerdiş. Bi taybetî heqê cinîyan mîyanê hêzanê pawitişî de bêro şinasnayîş. Na kampanya helwestê heme cinîyan a; ma vanê ganî nasname û bîyayîşê YPJ artêşa Sûrîyeyî de bêro qebûlkerdiş. Rojawayê Kurdistanî de ma kewtî prosesêkê newe. No prosesê entegrasyonî yo. Mîyanê munaqeşeyanê entegrasyonî de bîyayîşê YPJ mîyanê artêşê de nîno qebûlkerdiş. Hukmatê Sûrîye vano ‘çunke mîyanê artêşa Sûrîye de cinî nêeşkenê ca bigîrê, ma YPJ zî qebûl nêkenê.’ Ma waşt ke sey sazî û rêxistinanê cinîyan semedê YPJ kampanya dest pêbikerê. Ma na kampanya da destpêkerdiş ke têkoşîn, bîyayîş û nasnameyê YPJ bipawê û vengê xo biresnê heme cinîyanê dinya. YPJ nasnameyê ma heme cinîyan o, temsîlkarîya ma heme cinîyan keno.”   ‘YPJ şerê vera DAÎŞî de merdimayî pawit’   Gulistan Gulo dîyar kerd ke YPJ vera DAÎŞî şer kerd û heme merdimayî pawit û va: “YPJ şerê DAÎŞî de têkoşînêko zaf gird da domnayîş. Destpêkê şorişî ra heta nika YPJ mîyanê heme şeran de pawitişê heme cinîyanê herêmî kerd. Serêkanîyê ra heta Reqa, YPJ semedê xelaskerdişê cinîyan têkoşîn da. YPJ nê şerî de xeylê şehîdî dayî û gazîyê ci est ê. Bi hezaran cinî bîyî serkêşê nê şorişî. Şervanê YPJ nameyê xo tarîx de nuşt. Fermandarê sey Arîn Mîrkan, Avesta û heta peynî Denîze bîyî serkêşê cinîyan û cimatî. YPJ cinîyî vera qirkerdişî, şîdetî û semedê bibê wayîrê nasname pawit. Nika zî hukmatê demkî yê Sûrîye YPJ qebûl nêkeno. Semedê nê zî ma waşt ke bi na kampanya vengê xo biresnê heme hêzanê mîyaneteweyî û vajê ke YPJ hêzê heme cinîyan o. YPJ nê şerî de her wext serkêş bi. Bi hezaran cinîyê Şengalî çeteyanê DAÎŞî ra xelas kerdî. Eynî wextî de YPJ cinîyê Ereb, Durzî û Elewî zî pawitî.”   ‘Hukmatê demkî bîyayîşê cinîyan qebûl nêkeno’   Gulistan Gulo dîyar kerd ke hukmatê demkî nasnameyê cinîyan bi temamî qebûl nêkeno û nê çîyî ardî ziwan: “Nika ma destûrê newe yê Sûrîye de heqê cinîyan munaqeşe kenê. Hukmatê demkî tena YPJ nê, bi tu hawayî bîyayîşê cinîyan qebûl nêkeno. Nika Rojawayê Kurdistanî de heme sazî û dezgehê ke ameyî awankerdiş, bi serkêşîya cinîyan ameyî awankerdiş. Heme wareyanê cuyê de cinîyan rolêko gird kay kerd. Ma qebûl nêkenê ke hukmatê demkî yê Sûrîye îradeyê cinîyan qebûl nêkero. Ma bi israr ê ke bîyayîş û nasnameyê ma destûrê newe yê Sûrîye de bêro qebûlkerdiş. Ma heme wareyanê cuye de heqê cinîyan wazenê. Nika hukmatê demkî ziwanê ma zî qebûl nêkeno; çîyê ke hukmatê Sûrîye qebûl nêkero, ma do vera înan de her wext meydanan de bê û çalakîyanê xo bidomnê. Destkewteyê şorişê ma est bî, ma do nasnameyê xo bipawê û waştişê heqê xo dewam bikerê.”   ‘Hêzê mîyaneteweyî ganî zext hukmatê demkî ser o bikero’   Gulistan Gulo veng da hêzanê mîyaneteweyî ke paştî bidê pawitişê heqê cinîyan û va: “YPJ şerê DAÎŞî de têkoşînêko gird da domnayîş û pawitişê heme cinîyan kerd. Vengê ma hêzanê mîyaneteweyî û rêxistinanê cinîyan re no yo ke têkoşînê YPJ yo ke bi serran o yeno domnayîş, nêvînenî. Ganî zextêko gird hukmatê demkî yê Sûrîye ser o bêro kerdene ke nasname û bîyayîşê YPJ bêro pawitene. YPJ semedê pawitişê merdimayî vera DAÎŞî şer kerd. Hêzê mîyaneteweyî tena semedê YPJ nê, semedê heqê cinîyan ganî zext hukmatê Sûrîye ser o bikerê. Ganî destûrê newe de heqê cinîyan bêro pawitene û heme wareyê cuye de nasnameyê înan bêro qebûlkerdiş.”   ‘Ganî sazî û rêxistinê cinîyan tewrê kampanya bîbê’   Gulistan Gulo ard ziwan ke ganî heme sazî û rêxistinê cinîyan mîyanê na kampanya de ca bigîrê û qiseykerdişê xo wina qedêna: “Xeylê cinî û huqûqnasî paştî dayî kampanyaya ma. Xeylê mektubî zî semedê YPJ ameyî. Cinîyê Şengalî zî tewrê kampanya bîyî. Ma heme cinîyî deyndarê YPJ yê ke pawitişê ma heme cinîyan kerd. Vengê ma sazî û rêxistinanê cinîyan re no yo; tewrê kampanyaya pawitişê bîyayîşê YPJ bibê ke ma destûrê newe de nasnameyê cinîyan bipawê.”