Erex de meclîsê komunanê dewan ê cinîyan yenê awankerdiş 

2026-04-03 09:55:17


	 

	Gulîstan Gulmuş

	 

	RIHA - Cinîyan bale ant muhîmîya meclîsanê komunanê dewan ê cinîyan ke Erexî de yenê awankerdiş û wina vatî: “Ma wazenê cuya komunal tîya de awan bikerê. Nê hetî de vengê serekî ma rê bi qîmet o. Ganî meclîsî tîya de bi sînor nêmanê. Ganî her cayî de bêrê awankerdiş.”

	 

	Paradîgmaya demokratîk, ekolojîk û azadîya cinîyan ya ke Rayberê Şarê Kurdî Abdullah Ocalan pêşkêş kerd, tesîrê xo tena Kurdistanî ser nîyo, heme Rojhelatê Mîyanênî û dinya ser o keno. Dimayê vengdayîşê ke Rayberê Şarê Kurdî Abdullah Ocalan 27ê sibata 2025ine de kerd, mesajê ke ameyî şirawîtiş de ser muhîmîya awankerdişê meclîsanê komunî vindert. Dîyar kerd ke nê meclîsî do bibê bingehê cimatê demokratîkî.

	 

	Na çarçewa de munaqeşeyê derheqê awankerdişê meclîsanê komunî de dewam kenê. Yew cayê ke nê munaqeşeyî tîya de yenê domnayîş û heta amadekerdişê meclîsanê komunî dest pêkerd, dewa Erexî ya ke sey sosyalîst yena zanayîş a. Cinîyanê dewa Erexî ya Xelfetîya Rihayî, hewl danê projeya xo bi fikrî û fehmê Rayberê Şarê Kurdî Abdullah Ocalan aver berê.

	 

	Cinîyan derheqê proje de ajansê ma rê ercnayîş kerdî.

	 

	‘Serek bi eşkerayîyanê xo sosyalîzm tîya de da roniştiş’

	 

	Nahîde Saglamca derheqê dewa Erexî de agahî da û va: “Na dewêka sosyalîst a. Mi dî nêdî no wina yeno zanayîş. Nê hetî de ma şexsîyetê xo dî. Bi nê dir zî ma ver bi fikrî û fehmêk bîn ê verba yan zî raştî nêşîyî. Terzê cuya dewan û fikrî û fehmê ma berdî ver bi sosyalîstbîyayîşî. Ma xo wina danê bîyakerdiş. Bi eşkerayîyanê serekî ma sosyalîzm da roniştiş. Nê hetî de meclîsî û komunî do hîna zêde bêrê roniştiş.”

	 

	‘Meclîsê cinîyan wa heme dewan de bêrê roniştiş’

	 

	Nahîde Saglamca dîyar kerd ke fikrê meclîsê komunê dewan, fikrê Rayberê Şarê Kurdî Abdullah Ocalan ser de şekil girewt û wina dewam kerd: “Ma do dewe de meclîsê cinîyan awan bikerê û ma problemanê cinîyan ê ekonomîkî û yê bînan munaqeşe bikerê. Ma wazenê cinîyan biancê mîyanê têkoşînî û cimatî de hişmendîye awan bikerê. Ma wazenê terzê cuya komunal tîya de bi cinîyan dir bîyarê roniştiş. Serek zaf cuya komunal ser o vinderno. Ma zî no bi qîmet vînenê. Ma nêwazenê cuya dewe sey cuya bajarî bibo. Ma wazenê merdimî tîya de bi cuya komunal bibê hetkarê yewbînan. Nê hetî de xeta serekî ma rê bi qîmet a. Ma wazenê meclîsê cinîyan heme dewan de bêrê awankerdiş.”

	 

	‘Ma bi fikranê serekî projeya xo aktîf kerd’

	 

	Fatoş Durmuş zî va ke awankerdişê meclîsanê komunî muhîm o û wina va: “Ma wazenê cinî cimatî de vejê vernî û semedê cuyêk azade problemanê xo pîya pare bikerê û çareserî pê bîyarê. Nê semedî ra zî ma wazenê meclîsî awan bikerê. Verê zî ma qerarêk wina girewtibî. La tîya de ma projeyê serekî eşnawit û ma fikrê xo hîna zêde aktîf kerd. Ganî no proje tîya de bi sînor nêmano. Ganî her bajar û bajarokî de bibo. Semedê ke cinî xo xurt hîs bikerê ganî nê meclîsî her cayî de bêrê awankerdiş.”