Amed de kelecanê Newroze 

2026-03-21 10:30:42


	 

	AMED - Amed de zaf cayan ra herikîyayîşê şarî ver bi warê Newroze dest pêkerd. Taxan û bajaranê dormeyan ra zî zaf kesî seba beşdarîya Newroze yenê Amed.

	 

	Warê Newroze mîlyonêk ra vêşêr kesan paweno. Ewro heme bajarî de dikanî nêameyê akerdene û zaf noqteyanê bajarî de welatîyan dest bi herikîyayîşî kerd. Bi taybetî taxa Rezan de zaf noqteyan de hemwelatîyî ameyê pêser û bi dawile û zirneyan dest bi govendan kerd. Hemwelatîyê ke tîya de yê, wenîşenê wesayîtan û ver bi warê Newroze şinê.

	 

	Noqteyanê pêserbîyayîşan de bi hezaran hemwelatîyî ameyê têhet û cehdê şîyayîşê warê Newroze kenê. Mîyanê hemwelatîyan de zêdebîyayîşê cil û berganê neteweyî bal ante xo ser. Hemwelatîyê ke bi dawile û zurneyan govende gênê sloganê “Bijî Newroz” û “Bijî Serok Apo” erzenê.

	 

	Hîna kewtişê girseyî yê warî dest pênêkerdo la nika ra bi hezaran kesî vernîya beran de dest bi kombîyayîşî kerd. Hûmara girseyî her deqa zêde bena. Vernîya berê Zumrut Kentî de saetanê serê sibayî ra kombîyayîşê şarî dest pêkerd. Bi seyan kesî ameyê pêser û pawenê ke berî abîyê. Hemwelatîyan cilê neteweyî pay kerdî û xo pê kesk û sur û zerdan xemiland.

	 

	Badê ke berî ameyê akerdene kewtişê welatîyan warî zî dest pêkerd.

	 

	Bernameyê Newroza Amedî wina yo:

	 

	*Saete 10.00ine de do koma Kemençe vejîyo sehne ser.

	 

	*Komîteya Amadekarî ya Newroze do vejîyo sehne ser û girse silam bikero. Dimayê rêzgirewtişî do komîteya amadekarî û hemserekî qiseykerdişêk kilm roşan pîroz bikerê û şarî silam bikerê.

	 

	*Dima ra do konsera Dîlan & Erkan Top dest pêbikero. Dima ra Têgêrayîşê Cinîyanê Azadan (TJA) ra Ayla Akat Ata û Serekê Partiya Azadî Ayetullah Aştî do nameyê Tifaqa Partiyê Kurdî qisey bikerê.

	 

	*Dima ra do hunermend Alend Hazim vejîyo sehne ser.

	 

	*Do vîdeo-sînevîzyon bêro pêşkêşkerdiş.

	 

	*Mesajê Rayberê Şarê Kurdî Abdullah Ocalanî do bêro wendiş.

	 

	*Çetîn Arkaş û Tuncer Bakirhan do qisey bikerê.

	 

	*Agirê Jiyan do vejîyo sehne ser.

	 

	*Leyla Zana do qisey bikero.

	 

	*Zinar Sozdar do vejîyo sehne ser.

	 

	*Tewr peyîn do mesajê siyasetmedaran bêrê wendiş.