‘Ganî ma hemverê tarîtî de têkoşînê cinîyan pîl bikerê’ 

2026-03-12 09:18:07


	 

	Nazlican Nujîn Yildiz

	 

	ÎZMÎR - Cinîyan dîyar kerd ke merdişê biguman ê Fatma Nur Çelîk û kênaya aye ra sazîyê dewlete berpirsîyar ê û vatî ke ganî hemverê nê de têkoşînê rêxistinkerdeyê cinîyan bêro pîlkerdiş.

	 

	Tirkîya û Kurdistanî de şîdetê cinîyan ser o roje bi roje zêde beno û no tena girêdayê polîtîkayê bêcezaverdayîşî yê îqtîdarî nîyo. Her wareyî de hetê hişmendîyê mêrdan ra cinî û tutî qetil benê, gumanbarî bi paştdayîşê nê hişmendî qetil kenê, desteştiş kenê. Zaf mîsalê nê est ê. Îdarekarê Weqfê Xizmetê Quranî Ayhan Şenguler kênaya xo ya 3 serrî rê desteştiş kerdibi û dayîka aye Fatma Nur Çelîk hemverê nê de bi serran têkoşînê edaletî da. Rojê vîyarte de Fatma Nur Çelîk û kênaya xo biguman dinyaya xo bedelnayî.

	 

	‘Dewlete teşwîq kena’

	 

	Endama Komîteya Îdarekarîya Kongreya Demokratîk a Şaran (HDK) Ayşe Ozdamar derheqê merdişê biguman a Fatma Nur Çelîk û kênaya aye Hîfa Îkra de qisey kerd û va ke îhtîmalo ke aye ver bi întîxarî berdo zî qetilkerdiş o û wina va: “Hetê dejdayîşî hedîse no yo ke Fatma Nur Çelîk vatêne ‘asayîşê canê mi çin o.’ Ma her wesîleyî de vînenê ke nê welatî de edalet çin o. Qetilkerdişî bi eşkera yenê kerdiş. Heto bîn ra dosyayê Epsteîn est ê. Gelo çi cîyayî mabêne înan de est o? Çin o. Her di hetî zî eynî çî kenê. Yew çîyêk bîn şuxilneno, nê weqfan de îslam yeno şuxilnayîş, vanê ehlaq. La nê hedîseyî yewbînan ra cîya nîyê. Dewlete zî çimanê xo akerda temaşe kena. Goreyê mi no teşwîqkerdiş o.”

	 

	‘Emrê qijî de zewac, girêdayeyê sîstemê perwerdeyî yo’

	 

	Ayşe Ozdamar eşkera kerd ke vernîya zewacanê emrê qijî de akerdiş girêdayeyê sîstemê perwerdeyî yo û wina dewam kerd: “Teber de binê nameyê perwerdeyî de, keye de perwerde ardî rojeve û no dayeyê şîyayîşê dibistane yê tutanê kênayan girewt. Gelo nê tutî çi wanenê? Emrê qijî de yenê zewicnayîş. Weqfê wina bi qanûnanê ke dewlete vejena paştîdayîş gênê.”

	 

	‘Sazî û kesê berpirsîyar, berpirsîyarî xo ser ra eştî’

	 

	Platformê Ma Pîya Xurt ê yû Denîzliyî ra Elîf Kavîlî zî va ke Fatma Nur Çelîk demêk verê dîyar kerdibî ke aye heta 5ê çeleyî nêmanena û tehdîdanê qetilkerdişê ke girewtibî bi rayepêroyî dir pare kerdibî. Elîf Kavîlî nê ercnayîşî kerd: “Nê welatî de cinî û tutî bi eşkereyî yenê qetilkerdiş. Kesî û sazgehê berpirsîyar zî berpirsîyarî xo ser ra erzenê. Fatma Nur Çelîk 3 serrî bî têkoşîn kerdêne, edalet cigêrayîne. Semedo ke vengê xo bido eşnawitiş, vernîya edlîye de nobete girewtêne. Pêwa nê, gumanbaro Aydin Şenguler teber de gêrayîne. Pêwa nê, wezareta xizmetê keyeyî û komelî zûrê xo dewam kerd. Vatî Fatmanure dermankerdiş kênaya xo red kena. La ma êdî nê zûranê înan rindî zanê. Ma xo vîr ra nêkenê, selahîyetdaranê sazîyan şîyî keyeyê Fatma Nur Çelîk û tehdîdanê ‘ma do tute destê to ra bigîrê’ kerdî. Tarîkat û cematî vernîya heqê cuye û huqûqî girewtî. Zerrîya cinîyan de dej û hêrsê hezaran serrî est o. Ma cinî ancax yewbînan ra benê derman û çare. Sewbîna kesê bînî nêbenê derman û çare. Ganî ma hemverê nê tarîtîya rêxistinkerdeyî de têkoşînê cinîyan berz bikerê.”

	 

	Aktîvîsta Têgêrayîşê Cinîyanê Azadan (TJA) Şukran Adiyaman zî dîyar kerd ke demêk derg o hedîseyê tarîkatan rojeva Tirkîya de yê û rêxistinê wina bi taybetî cinî û tutî ser o xo danê domnayîş û va: “Mîsalê Fatma Nur Çelîk û kênaya aye Hîfa Îkra tewr somut o. Qîrayîşê Fatma Nur û tutaya aye eynî wextî de têkoşînê hemverê tarîtîye bi. Têkoşînê aye bi qîmet bî. Ma heme taqîbkerdoxê têkoşînê aye yê.”