Dewaya Rojda Yakişikli de qerarê nimitişî dewam keno

2026-03-11 10:21:33


	 

	AMED - Cipersayîşê Okay Gur ke çarçewaya Pakêta Edaletî ya 11ine de zîndan ra amebi veradayîş û demêk kilm de Rojda Yakişikli qetil kerdibî, dewam keno û qerarê nimitişî yê dosya ser o zî hema dewam keno.

	 

	Çarçewaya Pakêta Edaletî ya 11ine ke hetê Parlamento ra ameye tesdîqkerdiş, bi seyan sûcdarê mehkûm ameyî veradayîş, yew înan ra Okay Gur bî ke 4 serrî zîndan de mendibî. Vejîyabi orte ke Okay Gur, demo ke hîn verê berê zîndanî de bi, tehdîd Rojda Yakişikli rê kerdo ke bi merasîmêk dînî aye dir zewicyabi û vato, “Eke ti keye ra nêvejîyê, ez o to bikişî, ez o şima hemine bikişî.” Rojêk dimayê ke zîndan ra vejîya, 27ê Kanûna 2025ine de Rojda Yakişikli qetil kerd. Okay Gur dima ra ame destbendkerdiş û dimayê ke vejîya vernîya dadgehe, ame tepiştiş û berdîya zîndan.

	 

	Cipersayîş dewam keno!

	 

	Her çend 74 rojî qetilkerdişê Rojda Yakişikli ser o derbas bî zî cipersayîşê hedîse dewam keno. Ame zanayîş ke qerarê nimitişî yê derheqê dosya de cipersayîş de hema zî dewam keno.