Çîgdem Dogu: Do prosesê awankerdişê pozîtîfî bêro pîlkerdiş

2026-03-04 14:20:02


	 

	MERKEZÊ XEBERAN- Endama Konseya Rayraberdişî ya KJK’yî Çîgdeme Dogu vat ke serrgêra vengdayîşê 27ê sibate kontekstê şer û mudaxeleyê Rojhelatê Mîyanênî de ganî bierjîyo û nameyê şaran û cinîyan ser o vengdayîş, mudaxeleyêko stratejîk o.

	 

	Endama Konseya Rayraberdişî ya KJK’yî Çîgdeme Dogu Medya Xeber TV’yî de programêkê taybet qisey kerd û erjnayîşî kerdê.

	 

	Çîgdem Dogu vat ke prosesê demokratîkkerdişê Tirkîya bi qerardarîya vurîyayîşî şêno aver şêro û seba naye ganî Ocalan wayîrê şertanê sîyasetkerdişê azadî bo û wina domna: “Entegrasyono demokratîk bi munaqeşeyanê televîzyonan ney bi gamanê şênberan şêno aver şêro.”

	 

	Çîgdem Dogu vat ke gama “Nika Wextê Cinîyan o” ke KJK’yî 8ê adare de daye destpêkerdene, sey kampanyaya yew serre ameye plankerdene. Hedefê na game girdkerdişê vîr, rêxistinkerdiş, çalakî û komunbîyayîşê cinîyan o. Game prosesê “daraxê negatîfe ra berdişê daraxê awankerdişê pozîtîfî” esas gêna.

	 

	Çîgdem Dogu vat ke ganî cinîyî heme waranê komelkîyan de ekolojî, ekonomî, weşîye, perwerde û şîdetî de bibê kerdox û bedelê tewr gird ê şeran cinî û qeçekî danê û qiseykerdişê xo wina domna: “Ganî cinîyê qurbanê şeran nêbê, bibê hêzê awanker yê aştî û komelê demokratîkî.”

	 

	Çîgdem Dogu eynî wext de vat ke dosyaya Jeffrey Epsteînî rijîyayîşê sîstemê kapîtalîstî çimanê hemînan ver de mojneno û venga rêxistinanê cinîyan da ke hemverê îstîsmarê gedeyan, şîdet û kolonîye têkoşînê hîna rêxistinkerde û sîstematîk bikerê.

	 

	Çîgdem Dogu peynî de vat ke sloganê “Nika wextê cinîyan o” vengdayîşêk o ke cinîyî bi rêxistinbîyayîşê xo û awankerdişê komunanê xo komelê demokratîkî girs bikerê û prosesê 8ê adarê ra heta Newroze ganî bibê pirdêk ke têkoşînê cinîyan xurt bikerê.