‘Cinî aktorê sereyîn yê yewîya şarê kurdî yê’ 2026-02-28 12:01:21   AMED - Delegeya Platformê Yewîya Cinîyanê Kurdan Safiye Akdag dîyar kerd ke yewîya neteweyî ya kurdan bi taybetî bi xoverdayîşê Rojawanî eşkere bî û dîyar kerd ke cinî aktorê sereke yê nê yewîye yê ke hem bedel dayê û hem zî na yewîye xurt kerdê û bale ant ser muhîmîya tarîxî ya yewîya neteweyî semedê ameyoxê Şarê Kurdî.   Rewşa sîyasî ya Rojhelatê Mîyanên ke pirrî nakokî de, têkoşînê şarê kurdî semedê bîyayîşî tenya bi xoverdayîşê çekdarî nê, eynî wextî de bi cigêrayîşê yewîye, pêgirewtişî û îradeyê hempar zî yenê formkerdiş. Muhîmîyê nê bi taybetî Rojawan de dimayê hêrişê şarê kurdî ser, muhîmîya yewîya neteweyî xo da mojnayîş. Nê vengê kolektîf ke cinîyê kurdî serkêşî kerdî, hişmendîyêk sîyasî û vîrêk cimatî awan kerd ke sînoran derbas kerd. Nê semedî ra yewîya neteweyî tenya lazimîya tewr bingehîn ê semedê ewro yo, eynî wextî de do ameyoxê şarê kurdî bimojnê.   Na çarçewe de Hemşaredara Yenîşehîrî ya Amedî û delegeya Platformê Yewîya Cinîyanê Kurdan Safiye Akdag derheqê babete de qisey kerd.   ‘Proses mojneno ke yewîye çiqas muhîm a’   Safiye Akdag wina dewam kerd: “Nê xoverdayîşî dir reyke bîn vejîya ke yewîye çiqas muhîm a. Semedê heme şarê ke bindest ê, hemverê bindestî û bêheqîyan têkoşîn kenê yewîye xeylêk muhîm a. Coka taybetîya yewîya kurdan bi prosesê Rojawanî vejîya orte. Başûr, Bakur, Rojawan û Rojhelat ma eşkenê vajê ke serra 2014ine de yewîyêka xurt vejîyabî orte, labelê nika çar hetê Kurdistanî de heme kurdî bîyê yew veng. Bîyê yew qelb û semedê Rojawanî vengê xo berz kenê û îradeyê xo mojnenê. Bi taybetî cinî nê prosesî de xeylêk bedel dayî û hîna zî danê. Cinî xeylêk kede dayî.”   ‘Xebatê ma yê platformî dewam kenê’   Safiye Akdag wina peynî ard: “Binê nameyê platformî de xebatê ma bêmabêne domîyenê. Bakur de zî ma sey cinîyê kurdî heme cinîyî nê platformî de yê partîyan ser o kam fikr beno, yan wayîrê kam îdeolojî yo xem nîyo semedê yewîya kurdan nê cayî de pê dir bi serran o xebitênê. Xora her ke şino no platform hîra beno. Vengdayîşê ma oyo ke heme cinîyê kurdî ke ça benê wa bêbê, çi karî kenê wa bikerê, wayîrê kam bawerî û îdeolojî benê wa bibê, semedê yewîya şarê kurdî binê sîwanê Platformê Yewîya Cinîyanê Kurdan de bireso yewbînan.