DBP’yî derheqê 27ê Sibate de eşkerayîye da 

2026-02-27 14:52:27


	 

	MERKEZÊ XEBERAN - DBP’yî serrgêra yewîne yê vengdayîşê Rayberê Şarê Kurd Abdullah Ocalanî yo ke 27ê sibata 2025î de seba Aştîye û Komelê Demokratîkî kerdbî ser eşkerayîyêka nuştekîye pare kerde û wina va: “Seba ke vengdayîşê 27ê Sibate komelkî bibo, ganî reformê demokratîkî bêrê caardene.”

	 

	 Partîya Herêmanê Demokratîkan (DBP) serrgêra yewîne yê vengdayîşê Rayberê Şarê Kurd Abdullah Ocalanî yo ke 27ê sibata 2025î de seba Aştîye û Komelê Demokratîkî kerdbî ser eşkerayîyêka nuştekîye pare kerde.

	 

	Eşkerayîya DBP’yî wina ya:

	 

	“Rojhelato Mîyanêno ke sîya hemberîya enerjî-jeopolîtîk a hêzanê kûrewîyan, ferasetê netewe-dewlete yo yewperest û sînoranê ke kêmî-zêde seserre yo cetwelî reyde yenê xêzekerdene de şekil geno, ewro hema zî mîyanê çatrayîrê tarîxî de yo. Cografyaya ke bi seserrano şar, bawerîye û kulturî pîya ciwîyenê, rîyê polîtîkayanê kolonîzekeran û ferasetê dewlete yo ke înkarê kamîye esas geno, raştê xetanê fay yena.

	 

	Na sêmuga tarîxî de, 27ê sibata 2025î de vengdayîşê “Aştîye û Komelê Demokratîkî” yo ke hetê Rayberê Şarê Kurdî Abdullah Ocalanî ra virazîya, têna seba çareserîya persa kurdan beyanê îradeyî nîyo; derheqê ameyoxê Tirkîya û Rojhelatê Mîyanênî yê demokratîkî de perspektîfêkê stratejîkî pêşkêş keno. No vengdayîş kerreya tarîxî ya ke derbasbîyayîşê ver bi sîyasetê demokratîkî, hişbîyayîşê çekan û awankerdişê peymana demokratîke û komelkî esas gena, ya.

	 

	Mîyanê yew serra ke vîyarte de, qerarê feshkerdişê PKK’yî û eşkerayîya ey a ke derheqê anjîyayîşê teberê sînorî de ramojnenê ke proses beyanê yew terefî nîyo, eksê ci gamanê şênber û êyê ke ci ra apey agêrayîş mumkun nîyo reyde paştî dîyena ci. No averşîyayîş weçinitişo stratejîk û tarîxî yo ke demo ke tede hemberîyê herêmî û kûrewî zêdîyenê de seba aştîye virazîya yo. Eynî prosesî de bi Manîfestoyê Komelê Demokratîkî Komara Demokratîke û perspektîfê Entegrasyonê Demokratîkî têna semedê şarê kurdî nê; eynî wext semedê ameyoxê şaranê Tirkîya, Kurdîstan û Rojhelatê Mîyanênî çarçeweya şumûldare pêşkêş kenê. Komelkîbîyayîş û dezgehbîyayîşê nê nêzdîbîyayîşî zî peydakerdişê azadîya birêz Ocalanî û hêzdarkerdişê zemînanê muzakere ferz keno.

	 

	Labelê rixmê nê îradeyê hêzdarî, ma vînenê ke cepheyê îqtîdar û dewlete de eynî derax de gamê xirt û ravurnayoxî nêerzîyenê. Seke sey cewabê dezgehkî yê prosesî, Komîsyonê Demokrasî, Wayûbirayîye û Paştîdayîşê Neteweyî yo ke çarçewaya parlamentoyê Tirkîya de ronîya, girîng o, la raporo ke eşkera bî, pawitişanê komelî û perspektîfê çareserî yo ke peyda bî rê cewabbîyayîş ra dûrî yo. Ewro rewşa ke ma dekewtê ci de nakokîya serekeyî zelal a: dewlete û îqtîdar têna sey vatiş bale anjenê “aştîye û çareserîye”, ê nê vatişî gamanê huqûqî, sîyasî û qanûnîyan reyde hêzdar nêkenê. Oxina ke aştîye, têna rewşa bêpêkewtişî nîya; awankerdişê zemînê sîyasî yo ke tede pergalê huqûqê demokratîkî, hemwelatîya têduşte û kamîyî azadane yenê îfadekerdene yo. Çareserîye zî sernuşteyo taktîkî yo ke yeno taloqkerdene nîyo, mesuldarîyêka tarîxî ya.

	 

	 Ma serrgêra vengdayîşî ya yewine de zelal îfade kenê; ganî gamê ke erzîyayî mende bibê û bawerîya komelkî hêzdar bibo. Wedaritişê astengîyanê sîyasî û huqûqîyan, akerdişê vernîya sîyasetê demokratîkî, hêzdarbîyayîşê demokrasîyê herêmî û caardişê reformanê ke aştîya komelkî garantî kenê, êdî mecburîyeto ke nêro taloqkerdene yo.

	 

	Ma sey Partîya Herêmanê Demokratîkan bawer kenê ke awankerdişê aştîye û komelê demokratîkî têna menfaetê yew terefî nîyo, eynî wext menfaetê heme komelî yê hemparî yo. Coka ma îqtîdar û dewlete silahî kenê ke wa ê goreyê qerardarîya tarîxî têbigêrê; mesafeya ke mabênê vatiş û pratîkî de ya padê û gamanê ke prosesî bi pêkerdişê komelkî yê mende biqedênê, bierzê.

	 

	Merdim firsendanê tarîxîyan yan cesaretî reyde xebitneno yan zî bedelanê giranan reyde vîndî keno. Îradeyo ke seba çareserîye virazîyeno, zelal o. Êdî mesuldarîya ke nê nêzdîbîyayîşî kirişena ver bi zemînê mende û dezgehkî, doşanê îqtîdar û dewlete de ya. Prosesê awankerdişê komelkî, garantîya tewr pîl a ameyoxê ma yê hemparî ya.”