‘Ma do her cayî de bi kurdkî qisey bikerê’

2026-02-24 10:16:12


	 

	Buşra Tûran

	 

	AGIRÎ - Verfeka Komeleya Ziwan û Kulturê Kurdî ya Kurdî-Zan Araratî Dîcle Bozkurt dîyar kerd ke ziwan hetê tewr bingehîn ê têkoşînê bîyayîş û nasname yo û sansûr û zextê ziwanê kurdkî ser o tenya bi wayîrvejîyayîşê cimatî û zêdekerdişê komeleyê ziwanî eşkeno bêro derbaskerdiş.

	 

	Verfeka Komeleya Ziwan û Kulturê Kurdî ya Kurdî-Zan Araratî Dîcle Bozkurt ercnayîşê xo polîtîkayê ke ziwanê dayîke û ziwanê kurdkî ser o hedef gênê kerd.

	 

	‘Hetê muhîm yê nê şerî ziwanî ser o’

	 

	Dîcle Bozkurt dîyar kerd ke zextê ziwanê kurdkî ser o ciwîyenê û wina va: “Ziwan bîyayîş o. Hetê muhîmî yê nê şerî ke bi serran dewam keno ziwanî ser o yo. Ziwan dayîke yo, ziwanê dayîke yo; ma pê ci ciwîyenê, ma pê ci pîl benê û ma bi kurdkî cuyayîşê xo domnenê. Sey ke ma her tim va, ziwan têkoşînê bîyayîşî yo. Bêziwan cuyayîş çin o. Ma nêwazenê kurdkî wareyêk teng de bêro sînordarkerdiş. Ma wazenê meydanan, dibistanan û wareyê pêroyî de bi azadî bi ziwanê xo qisey bikerê, labelê ma vînenê ke çarçeweyêka teng dorê kurdkî de ameya awankerdiş. Ma bawer kenê ke no zext do bi zêdekerdişê komeleyê sey Kurdî-Zan Ararat bêro derbaskerdiş. Ma her wina sansûro ke medyaya sereke de kurdkî ser o yeno caardiş qebûl nêkenê.”

	 

	Dimayê 10 serran akerdiş

	 

	Dîcle Bozkurt wina dewam kerd: “Serra 2016ine ra heta 2025ine Agirî de komeleyêka ziwan û kulturî çin bî. Nêzdî 6 aşmî verê ma Komeleya Ziwan û Kulturê Kurdî yê Kurdî-Zan Ararat akerd. Reaksîyonê şarî yê hemverê na komeleya ke dimayê 10 serran akerd xeylêk pozîtîf bî. Ma wareyê ziwan û kulturî de çalakîyê tewir bi tewir pê anê û armancê ma yê tewr gird oyo ke şarî dir têkilî ronê. Kultur û ziwanê kurdkî ser o zextêk cidî est o û ma armanc kenê ke bi rayîrê komeleyan nê zextî bişikinê. Ma eşkenê vajê ke Kurdî-Zan Ararat nê zextî heta radeyêk Agirî de kêm kerdo.”

	 

	‘Ma do bi ziwan û kulturê xo ser bi kewê’

	 

	Peynîye de Dîcle Bozkurt wina va: “Komeleya ma di sinifê ziwanî est ê û sinifê ma yê kurdkî yê A-1 zî dewam kenê. Ma sewbîna qursê erbane û tembûrî zî dest pêkerdî. Bi temamî 80 wendekarî her di sinifan de perwerde vînenê. Wendekarê ke şinê dibistan zî semedê wendişê kitabxaneyî ma yenê. No semedê ma kêfweşîyêk pîl o. Ma eşkenê vajê ke Kurdî-Zan Ararat tesîrêk xeylêk pozîtîf bajaran ser o kerd. Ganî ma dibistan, keye, kuçe û heme hetê cuyayîşî de rojane bi kurdkî qisey bikerê. Ganî heta wexto ke esnafêk dir girewtiş kenê zî bi kurdkî qisey bikerê. Çiqas ma nê yewî zêde qebûl bikerê hende zêde zextê ziwanî ser o bişikinê. Ma do bi ziwan û kulturê xo ser bi kewê.”