Cinîyan semedê rayîrşîyayîşê Saraçhaneyî veng da 

2026-02-21 10:39:59


	 

	STENBOL - Meclîsê Cinîyan ê DEM Partî startê 8ê Adare Roja Cinîyan a Dinya 22yê sibate de Stenbol de bi rayîrşîyayîşêk girseyî dano. Sevtap Akdag ya DEM Partîyîje semedê aştî û têduştîye venga heme cinîyan kerd ke tewrê rayîrşîyayîşî bibê.

	 

	Meclîsê Cinîyan ê Partîya Têduştî û Demokrasîyê Şaran (DEM Partî) bi sloganê “Bi serewedaritişê xo ma bi xoverdayîşê xo cuyayîşê azad û têduştî mûnenê” do 8ê Adare Roja Cinîyan a Dinya startê ci bido.

	 

	Herêma Marmarayî de cinî amadekarîya 8ê Adare kenê. Stenbol de 22yê sibate de saete 14.00ine de Saraçhane ra heta Meydanê Aksarayî de rayîrşîyayîş pê bêro û startê 8ê Adare bêro dayîş. Verfeka meclîsê cinîyan ê DEM Partî Halîde Turkoglu, hemşeredarî, verfekî û heme cinîyê rêxistinê merkezî û qezayanî ci beşdar bibê.

	 

	Temsîlkara hemserekîya pêroyî ya DEM Partî Sevtap Akdag derheqê rayîrşîyayîş û 8ê Adare de qisey kerd. Sevtap Akdag bale ant ser tarîxê 8ê Adare û kesê ke bîyê sebebê awankerdişê na roje vîr ard.

	 

	8ê Adare de yew veng

	 

	Sevtap Akdag dîyar kerd ke 8ê Adare semedê cinîyan zemînêk pêvînayîşî yê pîlî yo û wina ard ziwan: “Emser zî cinî do hemverê hêrişan bibê yew û vengê xo yew bikerê û zemînêk têkoşînê hempar de bêrê têhet. Ma bi têkoşînê cinîyan yenê têhet. Ma hemverê şîdetê camêrdî xover danê û sey cinîyê ke cuyayîşê xo pawenê, têhet de ca gênê. Ma do dinyayêka azad, wareyê 8ê Adare bi şayîyêke bimojnê.”

	 

	Semedê aştî û têduştîyê ver bi wareyan de

	 

	Sevtap Akdag dîyar kerd ke meclîsê cinîyan ê DEM Partî sere de herêma Marmarayî û heme çar hetê Tirkîya do wareyan de bê û va do bi xetêk ke têduştî û aştîye paweno xebatan bidomnê. Sevtap Akdag wina dergî da: “Ma nê 8ê Adare de zî eynî hîsan wareyan de bê. Ma heme cayê Tirkîya de cinîyan dir bêrê têhet û 8ê Adare pîroz bikerê. Marmara de zî bi taybetî Stenbol, Bursa, Tekîrdag û Kocaelî de ma hemverê şîdetê camêrdî û feqîrîya cinîyan kuçe bi kuçe bigeyrê û cinîyan dir bêrê têhet. Ma 22ê Sibate roja yewşeme saete 14.00ine de Meydanê Saraçhaneyî de yenê têhet û heta Aksarayî rayîrşîyayîş kenê. Ma venga heme cinîyan kenê ke na roje uca bêrê têhet. Ma heme cinîyan dawetê pêvînayîşê pîlî yê Saraçhaneyî kenê.”