‘Ganî heqê ziwanê dayîke bikewo binê asayîşê qanûnî’ 

2026-02-20 11:05:03


	 

	STENBOL - Îdarekara Komeleya Cigêrayîşê Kurdî dîyar kerd ke ziwanê dayîke heqê merdimayî û azadîya fikr û fehmî yo û dîyar kerd: “Ganî kurdkî bikewo binê asayîşê qanûnî.”

	 

	Rêxistinê Perwerde, Zanist û Kulturî yê Neteweyê Yewbîyaye (UNESCO) serra 1999ine de 21ê Sibate sey Roja Ziwanê Dayîke ya Dinya neql kerd. Labelê, şarê ke Tirkîya û herêmê Kurdan de hemverê bi seserran polîtîkayê asîmîlasyonî yê ke ziwanê dayîke hedef gênê dir rî bi rî yê.

	 

	Îdarekarê Komeleya Cigêrayîşê Kurdî Melek Komurcu û Ruken Kalin derheqê muhîmîya ziwanê dayîke de qisey kerdî.

	 

	‘Ziwan heqê esasî yê merdiman o’

	 

	Melek Komurcu da zanayîş ke semedê ziwanê kurdkî bibo ziwanê fermî ganî binê asayîşê qanûnî de bo û va: “Ziwanê dayîke eynî wextî de heqê azadîya fikr û fehmî yo. Perwerdeyê bi ziwanê dayîke heqê merdimî yo. Ganî sererastkerdişî bêrê kerdiş. Ganî dibistanan, wareyê xizmetî, sektorê weşîye vernîya ziwanî bêro akerdiş. Perwerdeyê bi kurdkî muhîm o. Keyeyî heta emrêk tutê xo bi kurdkî pîl kenê. Labelê dima ra bi tirkî perwerde vînenê.”

	 

	‘Ganî babeta ziwanî de têduştî bibo’

	 

	Melek Komurcu va cayêk sey Stenbol ke xeylê nifûsê ci kurdî ê, hişyarîyê bi kurdkî çin ê labelê bi ziwananê cîya yê îngîlîzkî û erebkî est ê. Melek Komurcu wina va: “Eger behsê wayê û biratî kenê ganî ewil ziwan de têduştî bibo. Ziwan çin bibo kultur zî çin beno. Ziwan tenya hacetê qiseykerdişî nîyo, ruhê cuyayîşê kulturî yo. Ganî şaredarî û dewlete projeyê somutî aver berê û na nokta de gamê somutî bêrê eştiş. Ganî nêweşxaneyan, merkezê weşîye bi ziwanê dayîke xizmetî bêrê dayîş. Ganî wareyê îstîhdamî yê bi ziwanê dayîke bêrê akerdiş.”

	 

	‘Ganî ma xîtabî ciwanan bikerê’

	 

	Ruken Kalin zî dîyar kerd ke ciwanî çapemenîya dîjîtale de bi temaşekerdişê vîdeoyanê kilman çîyan musenê û va: “Ganî ma nê trendan de ca bigîrê û xo biresnê înan. Dinyaya dîjîtale semedê ciwanan dinyayêke newe û cîya ya. Cuyayîşê xo uca domnenê. Wexto muhtewayê kurdkî musenê nê parekerdişan ra musenê. Ganî ma zî kampanyayanê xo goreyê dinyaya înan plan bikerê. Platformê X de kurdkî eşkena bêro qiseykerdiş. Ma kampanyayanê xo şarî dir rêxistin kenê. Ma şarî ra piştîdayîşî wazenê. Ma şarî ra fikr gênê. Hewcedarîya ma bi kampanyayêke senîn est a ganî ma nê munaqeşe bikerê.”