Komeleya Cinîyan a Rosaye: Muracatê tehdîdî açaryayê şîdetê fîzîkî 2026-02-16 10:56:52   Pelşîn Çetînkaya   AMED - Endama îdarekarîya Komeleya Cinîyan a Rosaye Dîcle Sayyîgît dîyar kerd ke waştişê edaletî şibîyeno Azraîlî ra canwiştişî û va bêcezaverdayîş şîdetî pîl keno. Dîcle Sayyîgît da zanayîş ke tehdîdê kesê ke muracatê komeleyî danê, açaryayo şîdetê fîzîkî.   Şîdetê cinîyan ser o her ke şino zêde beno û cinî binê tehdîdê qetilkerdişî de têkoşînê cuyayîşî danê. Şîdetê fîzîkî, psîkolojîk û dîjîtal bêcezaverdayîş û binpaykerdişê sîstemî dir bîyo yew û cinî bêpawitiş yenê verdayîş. Komeleya Cinîyan a Rosaye ya Amed de ya, esasê muracatê ke gêna û taqîbkerdiş û çimdarîye de, şîdetê cinîyan ser o bi heme hetan vejena vernî û semedê hişmendî û wayîrvejîyayîşê heqê cinîyan xebatanê xo bi qerar domnena.   Endama Komeleya Cinîyan a Rosaye Dîcle Sayyîgît muracatê ke semedê komele yenê kerdiş, xebatê prosesê muracatî de yenê domnayene ajansê ma rê ercnayîş kerd.   ‘Hemverê heme tewirê şîdetî têkoşîn pîl beno’   Dîcle Sayyîgît bale ant serê hetê şîdetî yê nînê dîyayene û va xeylêk cinî şîdetê dîjîtal û psîkolojîk sey şîdet biname nêkenê û wina va: “Nê semedî ra ma xebatê xo esasê hişmendî û xurtkerdişî de domnenê. Cinî cimatî de bi şîdetê fîzîkî û psîkolojîkî rî bi rî yenê. Cinîyê ke şîdet vînenê û ferq nêkenê est ê. No problemêk bi tehluke yo. Ma na xebate û atolye xo de ferq kenê. Ma vînenê ke şîdetê dîjîtal û psîkolojîkî zêde nîno dîyayene. Eger şîdet fîzîkî nêbo cinîyê ke şîdet vînenê zî nê ferq nêkenê. Ma netîceya xebate û çimdarîyê xo de rayîr danê verê înan. Ma nê cinîyan rê vanê. Ma xebatanê xo psîkolog û komelnasan dir kenê.”   ‘Çimayê şîdetî bêcezaverdayîş û polîtîkayê sîstemî yo’   Dîcle Sayyîgît dewam de eşkera kerd ke şîdet semedê bêcezaverdayîş û teşwîqî zêde beno û wina dîyar kerd: “Ma daneyan ra ewnîyenê, şîdet roj bi roje zêde beno û şîdet semedê bêcezaverdayîş û teşwîqî zêde beno. No pratîk zî vernîya hêrişê  cinîyan ser o akeno. Cinî hetê kesê tewr nêzdîyê xo ra şîdet vînenê. Cimat û bêîstîqrarîyê sîyasî mîyanê keyeyî de açaryeno hêriş. Şîdet yeno meşrûkerdiş. Ganî ma nê problemî şexsî nê sey problemê sîstemî bigirê dest.”   ‘Waştişê edaletî şibîyeno Azraîlî ra canwaştiş’   Dîcle Sayyîgît peynîya qiseykerdişê xo de bi dîyar kerd ke sîstemê edaletî rewşa nika de bêîmkan o û wina peynî ard: “Ganî her kes berpirsyarîyê xo bigîro serê xo. Tenya rêxistinê cinîyan nê, ganî wezaretê edaletî, sazgehê keyeyî û heme sazgehê bînî berpirsîyarîyê xo bigîrê. Ganî her kes wayîrê hêza rêxistinbîyayîşê ke eşkeno nê sazgeh û mekanîzmayan bikero dewre bibo. Ma eşkenê rêxistinbîyayîşê xo hêza xo yê xoser bikerê. Rewşa nika de waştişê edaletî şibîyeno Azraîlî ra canwaştiş.”