
Hetkarîyê şarê Şengalî ver bi Rojawanî kewt rayîr 

2026-02-07 13:50:01


	&nbsp;

	MERKEZÊ XEBERAN - Cimatê Şengalî pêwa heme îmkanê xo yê kêmî û birînê xo yê kûrî, rojê tewr zehmetî de şarê Rojawanî tena nêverda. Şengal bi ruhê seferberîye dest bi kampanyayêka girdî ya hetkarîye kerd.

	&nbsp;

	Dimayê ke pêro dinya de semedê Rojawanî venga seferberî ame kerdiş, cimatê Şengalî zî yewser kewt mîyanê têgêrayîşî. Qonaxê yewine de bi rayîrşîyayîş û çalakîyê girseyî hêrişê Rojawanî ser o ameyî şermezarkerdiş. Qonaxê diyîne de kampanyaya hetkarîye 25ê aşme de dest pêkerd û heta 6ê sibate dewam kerd. Semedê şert û mercê giran ê zimistanî, şarê Şengalî bi giranî kelûpelê germkerdişî, cil û berg û lazimîyê bingehîn ê demsalî kom kerd.

	&nbsp;

	Semedo ke berê sînorî yê raste rast mîyanê Şengal û Rojawanî de ame girewtiş, şawitişê hetkarîye bi rayîrê alternatîfî mumkin bî. Hetkarîya ke 2 tiran ra pê yena, Şengal ra ver bi bajarê Dihokî ameye rayîrkerdiş û yeno pawitiş ke nê di tirê hetkarîye, siba berê Sêmalka yê mîyanê Başûr û Rojawanî de derbasê Rojawanê Kurdistanî bibê û biresê destê kesê lazimî.

	&nbsp;