‘Cinîyê Rojawanî bi nasnameyê cinîya azade bî nimûne û hêvî’ 

2026-02-07 11:04:00


	 

	Şehrîban Aslan

	 

	AMED - Zeynep Sîpçîk sebebê hedefgirewtişê cinîyan yê hêrişê  Rojawanê Kurdistanî ser de ercnayîş kerd û va: “Rojhelatê Mîyanên û dinya de nasnameyê cinîya azade bîya hêvî û nimûne.”

	 

	6ê çeleyî de hemverê Helebî hêrişî dest pêkerdî û dima ra Rojawan de vila bî. Hêrişan de ame waştiş ke kurdî bêrê qirkerdiş û destkewtişê kurdan orte ra bêrê wedaritiş. Labelê kurdî her parçeyê Kurdistanî û dinya de wuştî lingan ser û xo ver dayî. 30ê çeleyî de mîyanê HSD û HTŞ’yî de peyman û entegrasyonî de ame îmzakerdiş.

	 

	Serekê Komeleya Cinîyan a Rosaye Zeynep Sîpçîk derheqê babete de ercnayîş kerd.

	 

	‘Ya ke cîya kerd nasnameyê cinîya azade bî’

	 

	Zeynep Sîpçîk eşkerayî kerd ke hêrişê Rojawanî ser o topyekûn û hemverê xoverdayîş û nasnameyê kurdan bî û va: “Hêzê emperyalîstî wazenê nasnameyê koletî şarê mazlûmî ser o awan bikerê. Semedê nê nasnameyê koletî yenê redkerdiş zî hêriş kenê. Ganî ma heqîqet bidê orte. Yo Rojawan de yeno kerdiş hêrişê hemverê nasnameyê cinî û şaran o. Rojawan de 10 serrê peyênî de sîstemêk nimûne vejîya orte. Nasnameyê cinîya azad, temsîlkarî, meclîs, heyet û sazgehî ameyî awankerdiş. Yo ke Rojawanî taybet keno no yo. Rojhelatê Mîyanên de kaos û krîz tu wext peynî nêbîyo. Hêzê emperyalîstî wazenê tîya bi mudaxaleyan krîz vejê.”

	 

	‘Wazenê cinîyan bêhêvî verdê’

	 

	Zeynep Sîpçîk dîyar kerd ke cinîyê kurdî tarîx de cayê cîya gênê û wina dîyar kerd: “Awankerdişê cuyayîşê neweyî de cepheyê tewr verên de cinî est ê. Sîstemê Rojawanî de cinî serkêşî kerdî. Nê semedî ra Rojhelatê Mîyanên de nêwazenê cayêk sey Rojawanî vejîyo planê vernî. Wazenê uca qirkerdişêk girdî pê bîyarê. Nê Şêxmeqsûd û Eşrefiye de kerdî dewre. Nê hêrişî de tewr zêde cinîyan ziyan vîna, bedenê cinîyan awanîyan ra ameyî eştiş. No hovîtîyêk gird bi. Wazenê cinîyan bêhêvî verdê.”

	 

	‘Bi xêrê ruhê yewîya neteweyî no netîce vejîya orte’

	 

	Zeynep Sîpçîk peynîya qiseykerdişê xo de wina va: “Ma zaf sazgehê cinîyan û enternasyonalîstan dir kewenê têkilî. Nê têkiliyî xurt bîyî. Hemverê hêrişê Rojawanî ser o reaksîyonêk rêxistinkerde vejîya orte. Na nuqta de dîplomasî zî kewt dewre. Ma sey Komeleya Cinîyan a Rosaye, Komeleya Cinîyan a Star, Komeleya Cinîyan a Mîmoza rê zaf cayan rê mektube şirawit. Ma sazgehê teberê welatî rê zî şirawitî. Cewabê pozîtîfî ameyî dayîş. Bi Înîsiyatîfê Cinîyan a Lazimîya Mi bi Aştîye Est a dir zî têkiliyê ma est ê. Ma pîya şîyî sînorê Pirsûsî. Zaf xebatî bîyî. Cayê ke rêxistinkerdişê cinîyan est o nê zihniyetê lêşinî nêeşkeno lingan ser o bimano. Bi xêrê ruhê yewîya neteweyî no netîce vejîya orte.”