‘Tutî Kobanê de binê adirbestî de mirenê’  

2026-01-31 10:57:05


	 

	STENBOL - Endama Komîsyonê Heqê Tutan ê ÎHD’yê Stenbolî Melek Ramazanoglu dîyar kerd ke Rojawan de tutî semedê nasname û statuyê xo heqê cuyayîşê xo ra bêpar manenê.

	 

	Rojawan de semedê hêrişan cuyayîşê tutan kewt tehluke. Semedê biryayîşê ceyranî û sotemenî, ablûqakerdiş û astengkerdişê hetkarîya merdimîye, tutî yan raste rast semedê hêrişan yan zî serdî ra dinyaya xo bedelnayî.

	 

	Endama Komîsyonê Heqê Tutan ê Komeleya Heqê Merdiman (ÎHD) a Şubeyê Stenbolî Melek Ramazanoglu ajansê ma rê qisey kerd.

	 

	Melek Ramazanoglu dîyar kerd ke tutî bedelê tewr girdî danê û va: “Adirbestêk fiîlî çin o. Heqê cuyayîşê nifûsê sivîlî, bi taybetî tutan, binê tehdîdê girdî de yo. Nê hêrişê ke bi ferzkerdişê entegrasyonî  warê kurdan ser o dewam keno, semedê sîyasetê herêmî netîceyêk zaf tehluke dano. Hêrişê hemverê tutan binpaykerdişêka eşkera yê qanûnê merdimîye yê mîyanneteweyî yo. Pêwa Peymana Cenevreyî yê 1949ine de şert û mercê şerî de bi hawayêko sîstematîk yenê vindarnayîş.”

	 

	Melek Ramazanoglu dîyar kerd ke semedê ablûqayê herême raporê rast mimkun nîyê û raporê Çimdarîyê Heqê Merdiman a ke 25ê çeleyî de ame weşanayene ard vîr. Aye dîyar kerd ke rapor de şahidîyê korîdorê merdimîye yê Helebê ameyê akerdiş û rastê hêrişê segvanan ameyê. Raporê Rêxistinê Koçberîyê Mîyanneteweyî yê Neteweyê Yewbîyaye (IOM) yê 22ê çeleyî, tewr tay 134,000 kesî koçber bîyî û zêdeyêrî 41,000 sivîlî stargehê komî de Hesekê de ameyê bicakerdiş. Aye eynî demî de dîyar kerd ke IOM hişyarî dayo lazimîya lezgînî ya xida, nivîn û betanîyan ser o.

	 

	Melek Ramazanoglu bala xo ant na rastîya ke awanîyê sey DAIŞî bi polîtîkayê bêcezayîye yenê xurtkerdiş û qetî kerd ke ganî heme sûcdarê binpaykerdişê heqê merdiman bêrê tespîtkerdiş û ceza înan rê bêro birnayîş. Aye dîyar kerd ke anêkerdişê korîdorê merdimîye nîno qebûlkerdiş û helwestê dûrî yê cimatê mîyanneteweyî rexne kerd.

	 

	‘Na babete sîyasetî ra wetayêr a’

	 

	Melek Ramazanoglu vengdayîşê xo yê pêroyî de va: “Mergê panc tutan yê serdî ra bi dej mojneno ke çîyo ke Rojawan de qewimîyeno babetêka sîyasetî ra wetayêr a, sey Xezeyî. Na babetêka îdeolojîk nîya û ne zî babetêka sîyasî ya mîyanên a. Qanûnê merdimîye yê mîyanneteweyî tam semedê garantîkerdişê nê çîyî est o. Heme sazgehan kerd ke bê dizerrî semedê resnayîşê hetkarîya merdimîye herême rê seferber bibê.”