Rojnamegere Xezne Celal: Hetêk ra hêrişî hetêk ra zî xoverdayîş

2026-01-26 10:46:56


	 

	RIHA – Rojnamegere Xezne Celal bale ant serê hêrişê dewanê Kobanê û binpaykerdişê peymana 15 rojan ê adirbestî yê roja yewine ra û va: “Kobanî 26ê çeleyê 2015ine de çeteyê DAIŞî ra ame xelaskerdiş. Ewro zî vengdayîşêk est o ke bi eynî ruhî bêro pawitiş û hemverê hêrişan xoverdayîş bêro kerdiş.”

	 

	Pêwa ke çeteyê HTŞyî hêrişê xo hemverê Rojawanî dewam kenê, Hêzê Sûrîye Demokratîk (QSD) 24ê çeleyî de neql kerd ke adirbest semedê 15 rojanê bînan ameyo dergkerdiş. Labelê hêrişê Kobanê ser roja yewine ê neqlkerdişê adirbestî ra dewam kenê. Nê hêrişî bi giranî dewanê Şexler, Çelebî, Zerik, Xeta Sor û Qasniye de yê.

	 

	Rojnamegere Xezne Celal rewşa peyên a herême pare kerd. Xezne Celal dîyar kerd ke hêrişê Kobanê ser o prosesêk xidar o, labelê pêwa zehmetîyan zî xoverdayîşê girdî est o. Xezne Celal va: “Şewa vîyarte de QSD’yî newl kerd ke adirbestêk newe ameyo neqlkerdiş. Labelê ma sey şar û rojnamegerê ke tîya ciwîyenê, tu hêvîya ma adirbestî ra çin a. Semedo ke pêwa adirbestî zî hêrişî dewam kenê. Nê semedî ra şar seferberîya xo dewam keno. Rewşa Kobanê nika xirab a. Wexto ke hêrişî dest pêkerdî ra heta nika ceyran, awe û înternet ameyê birnayîş. Şar semedê lazimîyê xo tu rayîrî nêvîneno. Derûdorê Kobanê xeylêk kesî koçê Kobanê kerdî û kesê koçberî zehmetîyê girdî ciwîyenê.”

	 

	Tutêk dinyaya xo bedelna, çar kesî birîndar bî.

	 

	Xezne Celal dîyar kerd ke pêwa peymana adirbestî zî hêriş dewanê Kobanê ser o ameyî kerdiş û va: “Hêrişê dewanê Şexler, Zerik û Çelebiyê yê mîyanê sînorê Rojawanî ser o ameyî kerdiş. Şervanê YPG-YPJ’yî cewab dayî nê hêrişan. Çeteyî derbeyêk girdî werdî. Peymanêk 15 rojan ameyî îmzekerdiş. Labelê ewro çeteyê HTŞ’yî û komê paramîlîter ê girêdayeyê Tirkîya hêrişê Kobanê û dewanê ci kerdî. Hêrişî dewanê Şexler, Zerik û Çelebiyî ser o ameyî kerdiş. Şervanê YPG-YPJ’yî cewab dayî nê hêrişan. Çeteyan derbeyêk girdî werdî. Dewa Çelebî de xeylêk wesayîtê şerrî yê çeteyan ameyî îmhakerdiş. Dewa Şexler de xeylêk endamê HTŞ’yî ameyî qetilkerdiş. Dewa Xeta Sor de şerêk xidar dewam keno. Şerê mabêne YPG-YPJ’yî û komê paramîlîterî yê HTŞ’yî yê girêdayeyê Tirkîya de dewam keno. Netîceya hêrişê HTŞ û komê girêdayeyê Tirkîya ke verê şan de dewa Qasniye yê Kobanê kerdî, tutêk ame qetilkerdiş û 4 kesî birîndar bîyî.”

	 

	‘Ganî Kobanê bi eynî ruhî bêro pawitiş’

	 

	Xezne Celal qetî kerd ke ewro eynî demî de serrgêra xelaskerdişê Kobanê de çeteyê DAIŞî ra yo û wina vengdayîş kerd: “Kobanî 26ê çeleyî 2015ine de çeteyê DAIŞî ra ame xelaskerdiş. Labelê ewro ancî eynî roje de hêrişî yenê kerdiş. Nê semedî ra senîn ke şarê kurdî serra 2014-2015ine de pawitişê Kobanê kerdî, ewro zî vengêk semedê eynî tewir pawitiş û xoverdayîşî est o. Şarê Kobanê vernê de venga şarê kurdî keno, dima ra zî venga pêro dinya keno. Her kes deyndarê Kobanê yo. Nê semedî ra ganî her kes semedê Kobanê xo ver bido.”