‘Kobanê de yewîye bi ser kewt ma do xo ver bidê’

2026-01-21 10:58:05


	 

	Elfazî Toral

	 

	STENBOL – Dayîkê Aştîye reaksîyon vera hêrişê HTŞ’yî mojnayî û bale antî muhîmîyê yewîye ser û vatî: “Kurdan de yewîya kurdan serkewtiş ard. Ma do bi nê ruhî bi ser kewê û xo ver bidê.”

	 

	Hêrişê çeteyê HTŞ’yî yê hemverê Vakur û Rojhelatê Sûrîye dewam kenê û îdareyê xoserî zî seferberîya xoverdayîşî da destpêkerdiş. Kurdê her çar parçeyê Kurdistan û dostê kurdan vejîyayî kuçeyan û reaksîyon vera hêrişan mojnayî û piştîdayîşa xo ardî ziwan. Dayikê Aştiyê zî dîyar kerdî ke do Rojawanî dir piştîdayîş de bimanê.

	 

	Dayîka Aştîye Sultan Bozkurt da zanayîş ke nê hêrişê hemverê kurdan qebûl nêkenê û wina va: “Tu hetê merdimîye û exlaqî yê hêrişan çin o. Dewlete kurdan ra çi wazena? Çira hemverê kurdan şer danê destpêkerdiş, çira kurdan qetil kenê? Çira dinya bêveng a? Ez demo ke nê vînena qehr bena. Ganî tu kes bêveng nêmano. Vanê ma misilman ê û misilmanan qetil kenê. Vanê ‘Allahu Ekber’ û cinî û tutan qetil kenê. Nê hêrişî qebûl nêbenê. Wa lezkî peynî nê qirkerdişî bîyarê.”

	 

	‘Yewîye mifteyê aştîye ya’

	 

	Sultan Bozkurt bale ant serê yewîya kurdan û dîyar kerd ke nê demî de yewîye zaf muhîm a û wina ard ziwan: “Bi se serran o hemverê kurdan de hêrişî yenê kerdiş. Kurdan qetil kenê. Bi serran o no pratîkê qetilkerdişî nêvurya. Hêrişî Iraq, Îran û Sûrîye de dewam kenê. Nê hêrişî hemverê îradeyê şarê kurdî yê. Labelê eke kurdî bibê yew do serkewtiş bêro. Ganî ewil kurdî bibê yew. Ez venga pêro kesî kena. Wa bibê yew. Yewîye çinî bo serkewtiş zî çin o. Kurdî bi yewîya Kobanî bi ser kewtî. Ma eşkenê bi eynî ruhî bi ser kewê. Ma do bi eynî ruhî xo ver bidê.”

	 

	‘Bawerîya ma bi hêza ma est a’

	 

	Feleknaz Karabaş zî wina ard ziwan: “Ma semedê aştîye şîyî Anqara. Ma hemverê şerê Rojawanî rayîrşîyayîş kerd. Polîsan hewl dayî ma asteng bikerê. Labelê pêwa nê rayîrşîyayîşê xo ma kerd. Ma semedê cinî û tutanê ke yenê qetilkerdişî ware de yê. Tu kes dostê kurdan nîyo. Kurdî dostê xo yê. Bawerîya ma bi ma û hêza ma est o. Semedê yewîye ganî ma destê xo bidê yewbînan.”