Hemsereka Heyva Sor a Kurdî: Bêvengî bî sebebê qirkerdişî 2026-01-13 10:45:23   Derya Ren    RIHA – Hemsereka Heyva Sorî ya Kurde Hediye Abdula dîyar kerd ke 110 birîndarê ke taxê Şêxmeqsûd û Eşrefîye yê Helebî ra ameyê tehliyekerdiş, di kesî merdê û dermankerdişê birîndarê mende zî dewam keno.   Hetêk ra hêrişê ke 6ê çeleyî de hetê çeteyê girêdayeyê Hukmatê Demkî yê Sûrîye ra hemverê taxê Şêxmeqsûd û Eşrefîye yê Helebî dest pêkerdî dewam kenê, heto bîn ra bi peymana adirbestî ke bi mîyançîyê mîyanneteweyî ame kerdiş sivîlî taxan ra yenê tehlîyekerdiş, bi taybetî birîndarî yenê tehlîyekerdiş. Kesê ke ameyî tehlîyekerdiş ver bi cayanê asayîşî yê Vakur û Rojhelatê Sûrîye yenê şirawitiş û eynî demî de dermankerdişê birîndaran dewam keno.   ‘110 birîndarî hetê Heyva Sorî ra ameyê pêşwazîkerdiş’   Hediye Abdula dîyar kerd ke 110 birîndarê ke Şêxmeqsûd û Eşrefîye ra ameyî vetiş û ardê Derhafira, hetê Heyva Sorî ra ameyê pêşwazîkerdiş û va ke di kesî birîndaran ra merdê. Hediye Abdula va, “Ma birîndaran nêweşxaneyê Tebqa, Reqa û Hesekê de bica kerd. Nêzdîyê 600-700 sivîlî ke yenê texmînkerdiş 70 ci keye yê, nika binê çimdarîya ma de yê.”   ‘Ma hewl da ke Xaça Sor û Heyva Sorî dir têkilî ronê’   Hediye Abdula dîyar kerd ke Şêxmeqsûd û Eşrefîye di tîmê înan est ê û va, “Her di tîmê ma semedê temînatkerdişê ewnîyayîşê weşîye têkoşîn kerdî. Pêwa kêmbîyayîşê çimeyan zî hewl danê ke çîyê lazimî bikerê. No 5 aşmî yo ablûqakerdişê nê taxan tesîr ma ser o zî kerd. Bêvengîya rêxistine heqê merdiman ê mîyanneteweyî bîyê sebebê hêrişê nêweşxaneyî ser. Ma hewl da ke bi Xaça Sor û Heyva Sorî ya Ereban ke wareyê mîyanneteweyî de kar kenê têkilî ronê. Ma waştiş kerd ke semedê resnayîşê birîndaran korîdorêk bêro akerdiş. Labelê rayîrî nêameyî akerdiş.”   ‘Ma hewl danê ke hewcedarîyê înan bica bîyarê’   Hediye Abdula dîyar kerd ke dermankerdişê birîndaran nika dewam keno û wina peynîya qiseykerdişê xo ard: “Xêrcê birîndaran, ma hewl danê ke hewcedarîyê merdimê ke her di taxî ra ameyê tehliyekerdiş bica bîyarê. Ma newe ra qirkerdiş şermezar kenê. Sey Heyva Sor a Kurdî, ma do xebata xo ya ke serra 2012ine ra nata kenê dewam bikerê. Ma do hewl bidê ke hewcedarîyê bingehîn ê şarê xo bica bîyarê.”