Waştişê dayîkan azadîya fîzîkî ya Abdullah Ocalanî ya  

2026-01-10 10:49:36


	 

	Neslîhan Kardaş

	 

	ŞIRNEX - Cinîyan bale ant azadîya Rayberê Şarê Kurdî Abdullah Ocalan ser û wina vatî: “Azadîya Birêz Abdullah Ocalanî tena babeta azadîya kesêk nîya. Mifteyê çareserîyê demokratîkî yê problemê kurdî yo. Ma wazenê serekîya ma azad bibo û bi hawayêko azad sîyaset bikero. Ma wazenê Abdullah Ocalan bêro veradayene û azadîya fîzîkî bêro caardiş.”

	 

	Bi vengdayîşê Rayberê Şarê Kurdî Abdullah Ocalanî yê ‘Aştî û Cimatê Demokratîkî’ ke 27ê Sibate 2025ine de ame kerdiş vernîya prosesêk neweyî Tirkîya û Kurdistan de dest pêkerd. Nê vengdayîşî şarî dir hêvî awan kerd. Hetê prosesê aştîye Rayber Abdullah Ocalanî 1999ine heta nika Îmraliyî de tepişte yo û yew waştişê bingehîn yê şarê kurdî zî azadîya Abdullah Ocalanî yo.

	 

	Cinîyan derheqê babete de ajansê ma rê ercnayîş kerd.

	 

	‘Aştî û demokrasî bi gamê cesaretî mumkin o’

	 

	Hemsereka Partîya Têduştî û Demokrasîyê Şaran (DEM Partî) ya Cizîrî Fîlîz Acu bale ant prosesê 27ê Sibate heta nika dewam keno ser û wina dewam kerd: “No proses cimatî dir pabemendiş virazêno zî labelê hema hukmatî gameka zelal nêeşta. Çareserîyê prosesî bi gamanê zelal, eşkere û zemîno ke îradeyî nas keno mumkin o. Eynî demî de aştî û çareserîya demokratîk ne bi vatişan, bi gamanê zelal û cesaretî mumkin a.”

	 

	‘Azadîya Abdullah Ocalanî mifteyê çareserîye yo’

	 

	Fîlîz Acu dewamê qiseykerdişê xo de wina va: “Abdullah Ocalan bi serran o babeta kurdî de muxatab ame girewtiş û aktorê yewine yê çareserîye yo. Eke bi rastî aştî û çareserîyêk bêro hedefkerdiş, ganî vernî de tecrîdê Abdullah Ocalanî ser o bêro wedartiş. Azadîya fîzîkî problemêko nêeşkeno bêro taloqkerdiş. Azadîya Abdullah Ocalan babeta azadîya kesêk nîya, mifteyê çareserîyê demokratîkî yê problemê kurdî yo.”

	 

	‘Pêwa prosesî ablûqa dewam keno’

	 

	Hemsereka Partîya Demokratîk a Herêman (DBP) ya Cizîrî Aynur Elçîoglu zî dîyar kerd ke ê serrêke yo sey partî prosesî taqîb kenê û destpêkê prosesî ra taxan de prosesî şarî rê qal kenê. Aynur Elçîoglu wina dewam kerd: “Demo ke vengdayîşa 27ê Sibate ame kerdiş şar zaf tesîr girewt. Dima bi gamê PKK’yî proses dewam kerd. Ma pêro tesîr bî. Dimayê qerarê fesihkerdişê PKK’yî dayîkêke vatbî ‘do tutê ma êdî kuçeyan de zî nêeşkê rayîr ra şêrê.’ No vatiş mi ser o zaf tesîr kerd. Şarê kurdî proses taqîb keno. Nika pêvînayîşî yenê kerdiş labelê ma vînenê pêwa prosesî hema dorê ma hetê polîsan ra yeno ablûqakerdiş. Na rewşe zî tesîrêk gird şarî ser o kena. Her kes vano nê zextî çî yê. Ma semedê hîrê cinîyanê Sîlopiya ameyê qetilkerdiş rayîrşîyayîşêk viraşt. Labelê dorê ma girewtî. Destûrê rayîrşîyayîşê ma nêdayî. No zî tesîrêk negatîf şarî ser o keno. Madem proses est o nê zextî çira yenê kerdiş.”

	 

	‘Ganî semedê azadîya fîzîkî gamî bêrê eştiş’

	 

	Aynur Elçîoglu dîyar kerd ke şarê kurdî edalet û azadîya serekîya xo wazenê û wina peynîya qiseykerdişê xo ard: “Azadîya Birêz Ocalanî azadîya ma pêro yo. Ganî sey pêro şaran şarê kurdî zî serekîya xo dir têhet bê. O yo ke aştî û têduştî bîyaro Birêz Ocalan o. Birêz Ocalan semedê prosesî zaf gamî eşt. Labelê semedê azadîya Birêz Ocalanî gamêka ke ameya eştiş çin a. Ma wazenê azadîya serekîya ma bêro caardiş.”

	 

	‘Nêeştişê gaman ma tersneno’

	 

	Dayîka Aştîye Şîrîn Demîr zî wina va: “Pêwa Abdullah Ocalan û PKK’yî semedê aştîye gamê muhîmî eştî zî hema hetê dewlete gamî nêeştê. Abdulllah Ocala hetê aştîye yo. Semedê aştîye gamê muhîmî eştî. Labelê semedê dewlete gaman nêerzena ma tersenê. Ma vanê gelo ma ancî xapênenê. Birêz Ocalan û gerîlayan rê bawerîya ma bêpeynî ya. Ma çîyêk dewlete ra nêwazenê. Ma azadîya fîzîkî ya serekê xo wazenê. Ma hemverê şerî yê. Ma aştîye wazenê.”