Kurdish Monitoringî: 2025ine de tewr tay 70 binpaykerdişê ziwan û kulturî ameyî kerdiş

2026-01-09 15:00:52


	 

	AMED- Goreyê raporê Kurdish Monitoringî kategorîyê Qadê Komelkî de 25, Medya de 15, Kultur û Hunerî de 18 û sewbîna kategorîyê Hepisxaneyan de zî 12 binpaykerdişî ameyê komkerdene.

	 

	Kurdish Monitoringî binpaykerdişê sîstematîk ê ke serra 2025î de Tirkîya de vera ziwan û kulturê Kurdkî ameyê kerdene, kom kerdê û sey raporî weşanayê. Goreyê raporî mîyanê serre de qadê komelkî, medya û kultur û hunerî de û hepisxaneyan de vera heqê şuxulnayîşê Kurdkî tewr kêm 70 binpakerdişî ameyê kerdene.

	 

	Daneyê ke rapor de yê, dîyar kenê ke binpaykerdişî tayê qadan de hîna zaf yenê vînayene. Goreyê raporî serra 2025î de; kategorîyê qadê komelkî de 25, kategorîyê medya de 15, kategorîyê kultur û hunerî de 18, kategorîyê hepisxaneyan de 12 binpaykerdişî, pêro pêser 70 binpaykerdişî ameyê komkerdene.

	 

	Raporê serra 2025 ê Kurdish Monitoringî reyêka bîne mojneno ke Tirkîya de binpaykerdişê vera ziwan û kulturê Kurdkî yenê kerdene, yew di hedîseyî nîyê. Nê binpaykerdişî heme qadanê komelî ra vila bîyê û biserûber yenê kerdene. Daneyê emserrî ke ameyê komkerdene mojnenê ke şuxulnayîşê Kurdkî tena kuçeyan de nê, eynê wextî de hepisxaneyanê ewleyîya berze de, salonê veyveyî de, kampusanê unîversîte de û Parlamento de de yeno krîmînalîzekerdene.

	 

	Destbendkerdişê ciwananê Colemêrgî ke bi deyîranê Kurdkî govende girewtêne, girewtişê mîkrofonê parlamenteran ke Parlamento ke Kurdkî qisey kerdêne, girewtişê Mela Sîlêman Sebrî yê seba xutbeya bi Kurdkî, qedexekerdişê formayanê Amedsporî yê serê ci de vatişêko Kurdkî ameyo nuştene û gelekî hedîseyê bînî mojnenê ke nê binpaykerdişî heme qadan de yenê kerdene. Nuqtayêka bîne ke vejîyay vernî a ya ke hema zî polîtîkaya “ziwano ke nêyeno zanayene” û “…” de bi israr dewam keno. No sansuro ke Parlamento de yeno kerdene, bi rengêko ke hepisxaneyan de mektubê bi Kurdkî yenê astengkerdene û qiseykerdişê bi Kurdkî yo bi rayîrê telefonan yeno qedexekerdene, xo mojneno.