‘Serek azad bibo do Tirkîya azad bibo’ 2025-12-31 09:43:40   Elfazî Toral   STENBOL – Cinîyan semedê mitîngê “Hêvî û Azadîye” ke do 4ê Çeleyî de bi serkêşîya DEKUPî Amed de bêro viraştiş, veng dayî û vatî: “Azadî semedê her kesî derbasdar a. Serek azad bibo do Tirkîya zî azad bibo.”   4ê Çeleyî de hetê Platformê Sazgehê Demokratîkan (DEKUP) Amed de do mitîngê “Hêvî û Azadîye” bêro viraştiş. Tena Kurdistan de nê, yeno pawitiş ke her bajarê Tirkîya ra zafê merdimî tewrê mitîngî bibê. Mitîng do 4ê Çeleyî de Meydanê Îstasyonî de saete 13.00ine de bêro viraştiş. Xebatê semedê mitîngî dewam kenê. Yeno pawitiş ke Veysî Aktaş û Çetîn Arkaş, hemsereka Pêroyî ya Partîya Herêmanê Demokratîkan (DBP) Çîgdem Kiliçgun Uçar, hemserekê pêroyî yê Partîya Têduştî û Demokrasîyê Şaran (DEM Partî) Tuncer Bakirhan, aktîvîsta TJAyî Ayla Akat Ata û sîyasetmedare Leyla Zana mitîng de qisey bikerê.   ‘Ma bi dewlete bawer nêkenê’   Dayîka Aştîye Emîne Erbek bale ant ser prosesê Aştî û Cimatê Demokratîkî û da zanayîş ke ganî şarê bindestî yew bibê û ganî azadîya Rayberê Şarê Kurdî Abdullah Ocalanî bêro ca. Emîne Erbek wina ard ziwan: “Bêxoverdayîş serekîya ma azad nêbeno. Ganî her kes vengê xo berz bikero. Ganî lezkî azadîya fîzîkî ya serekî bêro ca. Serekê ma bi serran tepişte yo. Ê ke azadî wazenê ganî semedê azadîya Abdullah Ocalanî têkoşîn bikerê. Hetê şarê kurdî de hêvîya ma est a. Labelê hêvîya ma bi dewlete çin a. Bawerîya ma pê çin a.”   ‘Azadî semedê her kesî lazim a’   Dayîka Aştîye Cemîle Çîftçî zî wina ard ziwan: “Ma azadîya fîzîkî ya serekîya xo wazenê. Ganî serekê ma bêro meclîs û uca de qisey bikero. O azad nêbo kes azad nêbeno. Ma game eştî nika dora dewlete ya. Azadî semedê her kesî lazim a. Azadî semedê aştî, têduştî û demokrasî muhîm a. Ganî her kes tewrê mitîngî bibo. Ma do semedê serekîya xo meydanan de bibê.”   Semedê mîtîngî vengdayîş   Endama Meclîsê DEM Partî Gonca Yangoz: “Îmkanê çareserîye, hêvîyê girdî semedê azadîye awan kenê. Serkewtişê prosesî yewine rayîro ke şar bireso azadîya xo. Semedê aştî û azadîye ganî pêro şarê ma tewrê mitîngê 4ê Çeleyî ke Amed de yeno viraştiş bibê.”