‘Wa 2026ine bibo serra azadîya tepişteyan’

2025-12-26 15:05:10


	 

	WAN – Sazgehê demokratîkî û partîyê sîyasî bi munasebetê serrnewî kart tepişteyan rê şirawitî. Hemserekê Şubeyê TUHAY-DER’î yê Wanî Osman Başak ke vernîya şirawitişê kartî qisey kerd waşt tehlîyekerdişê tepişteyê sîyasîyan û hêvî kerde ke serra 2026ine bibo serra azadîya şaran.

	 

	Sazgehê Demokratîkan û partîyê sîyasîyan ê Wanî bi serkêşîya Şubeyê Komeleya Piştîdayîşê bi Keyeyê Tepişte û Hikûmwerdoxan (TUHAY-DER) ê Wanî bi munasebetê serê serre kart tepişteyan rê şirawitî. Girseyo ke vernîya şirawitişê kartî verê PTT yê taxa Rêya Armûşî yê Wanî de eşkerayîyêke dayî. Eşkerayîye de sloganê “Biciwîyo xoverdayîşê zîndanan” ame berzkerdiş. Parlamenterê DEM Partî yê Wanî Mahmûd Dîndar, temsîlkarê sazgehan û zaf merdimî tewrê eşkerayîye bîyî.

	 

	Hemserekê Şubeyê TUHAY-DERî yê Wanî Osman Başak eşkerayîye de qisey kerd û bale ant serê prosesê “Aştî û Cimatê Demokratîkî” û dîyar kerd ke pêwa prosesî zî zafê zîndanan de tedayî tepişteyan ser o dewam kenê. Osman Başak da zanayîş ke heqê tepişteyan yeno binpaykerdiş û va: “Ma wazenê heta serê serre tepişteyan verabidê û binpaykerdişê heqan biqedîyo. Bi seyan tepişteyî nêweş ê, tepişteyê emrê girdî est ê û ma wazenê ê bêrê veradayene. Sewbîna ma wazenê semedê birêz Ocalanî heqê hêvîye bêro caardiş. Ma do bi munasebetê serê serre kart tepişteyan rê bişirawê, Hêvîya ma na ya ke serra 2026ine bibo serra azadîya pêro şaran, cuya têduşt, caardişê huqûqî.”

	 

	Parlamenter Mahmûd Dîndar zî qisey kerd û dîyar kerd ke prosesê “Aştî û Cimatê Demokratîkî” semedê pêro şaran firsendêko gird o û waşt serra 2026ine bibo serra azadîye.

	 

	Dimayê eşkerayîye kartî tepişteyan rê ameyî şirawitiş.