‘Sûcê camêrdî bi ziwanê çapemenîye yeno awankerdiş’ 2025-12-24 10:35:46   Devrîm Findik   STENBOL - Evrîm Kepenek derheqê hedîseyanê tacîz û desteştişê hemverê tutan ê TBMM’yî de qisey kerd û va: “Ma bi zincîra sucanê camêrdan ê ke nêeşkenê bêrê înkarkerde rî bi rî yê. Çimeyê nê zî tena gumanbarîya şexsî nîya; ziwano ke çapemenî bi serran o bi zanayîş şuxulnenê yo.”   Çapemenîya terefgire de bi serran o hedîseyê desteştişî heta nika bi destê îqtîdar û tehdîdkerdişê rojnamegeranê cinîyan ameyî nimitiş û operasyonanê peyênan dir hemverê cinîyan desteştiş newe ra ame dîyayene. Edîtora Xeberanê Cinîyan a Bîanetî û yew Îdarekara şubeyê Sendîkaya Rojnamegeranê Tirkîya ya Stenbolî (TGS) Evrîm Kepenek derheqê hedîseyê desteştişê meclîsî û ê ke sazgehê çapemenîya terefgire de vecîyayê meydan de ercnayîş kerd.   ‘Cinî tehdîdê bêkar mendişî dir rî bi rî yenê’   Evrîm Kepenek eşkera kerd ke hedîseyê tacîzî ke çapemenîya terefgire de vecîyayî meydan hîrê hetî yo û va: “Vernîya pêro çîyan babetêka sîyasî est a; ya dîyine zî heqê cinîyan nê babetan de do çiqas bêrê dîyayene? Ya hîrêne zî hawayê nimitişê hedîseyî hetê çapemenîye ra yo. Vîyarte ra heta ewro piştîdayîşêko bêveng ê camêrdan û çapemenîye hemverê nê hedîseyan est o. Hedîseyê desteştişî nêvecîyenê meydan. Rojnamegerê cinî semedê sebebanê qaydeyê nênuşte veng nêvejenê. Cinîyê ke veng vejenê zî bi rîskê vetişê karî dir rî bi rî yenê.”   ‘Na dewayêka sîyasî ya’   Evrîm Kepenek eşkera kerd ke Nur Koşker hetê Mehmet Akîf Ersoy ra rastê desteştişî ameye, mecbur menda welat verado û va, cinî mehkûmê merdişê cimatî benê. Evrîm Kepenek eşkera kerd ke çapemenîye de kulturê îfşakerdişî zaf zehmet o û zaf qij yeno dîyayene û wina dewam kerd: “Mehmet Akîf Ersoy bi mudaxeleyê dadgehe ame îfşakerdiş. Mehmet Akîf Ersoy ke çapemenîye de ‘împaratorîya hêzî’ viraştebî çira nika ame îfşakerdiş, ganî no bêro qalkerdiş. Hedîseyêke ameyê ciwîyayîş dewayêka sîyasî ya. Hetê îqtîdarî de Mehmet Akîf Ersoy hacetê şuxulnayîşî bî. Ewro Mehmet Akîf Ersoy şino, kesê ke bênê cayê ey zî newe ra sey hacet bênê şuxulnayene û wê zî camêrd bibê. Nê camêrd zî sucanê bînan bikerê. Babeta Mehmet Akîf Ersoy zincîra lêşinê çapemenîye ya. Labelê çi heyf tena zincîrêke nîya. Pey de konjonktureko sîyasî est o. Ma cinîyê rojnamegerî ganî hemverê nê têkoşîn bikerê.”   ‘Heta ziwan nêvurnê, do no şîdet xo newe ra awan bikero’   Evrîm Kepenek peynîya qiseykerdişê xo de derheqê hedîseya desteştişê hemverê tutan ê TBMM’yî zî wina qal kerd: “TBMM ke ganî tutan û cinîyan bipawo, nuqtaya ke ameyo her çî mojneno. Bi rastî eke ma qalê ci bikerdêne do hende nêameyîne dîyayîş. Çîyê ke ameyê ciwîyayîş mîsalêko derg ê vernîya ma de yo. Ma zincîra sucanê camêrdan ê ke nêeşkenê bêrê înkarkerdene dir rî bi rî yê. Çimeyê nê gumanbarîya şexsî nîyo; ziwan, xebere, vatiş, sernameyo ke çapemenî bi serran şuxulnenê yo. Heta ziwan nêvurnê, nê şîdetî xo newe ra awan kenê.”