Pêwa îşkenceyo giran fek waştişê aştîye ra veranêda 2025-12-23 10:51:17   Gulistan Gulmuş   RIHA – Dayîka Aştîye Gulbaran Orgun ya ke tutîya xo de hemverê înkarkerdişê nasnameyê xo têkoşîn da, va: “Ê mi biveşnê zî ez fek nê rayîrî ra veranêdana.” Gulbaran Orgun bale ant ser lazimîya azadîya fîzîkî ya Rayberê Şarê Kurdî Abdullah Ocalanî zî û pers kerd, “Çira serekîya ma azad nêkenê?”   Seserrî yo ke kurdê ke Kurdistan û bajaranê Tirkîya de ciwîyenê hemverê înkarkerdişê nasnameyê xo têkoşîn kenê. Pêwa îşkence, qetilkerdiş û tepiştişî tewr zêde Dayîkê Aştîye têkoşînê xo domnayê. Reyan germê hamnanî de, reyan serdê zimistanî de, varan de, vengê dayîkan her tim semedê aştîye berz bî. Dayîkî bi eynî qerardarî û israrî têkoşînê xo semedê aştîye domnenê.   Gulbaran Orgun, yew dayîkanê aştîya ke waştêne nasnameyê xo bipawo û hemverê polîtîkayanê înkar û îmhayî de vecîyo, 16 serrîya xo de dest bi têkoşînî kena.   Têkoşîno ke keye de dest pêkerd   10ê kanûne de, Dayîkê Aştîye zaf bajaran de hemverê tecrîdê Rayberê Şarê Kurdî Abdullah Ocalanî ser o eşkerayî dayî çapemenîye. Yew cayo ke eşkerayîya çapemenîye uca de ameye dayîş zî qezaya Xelîliye ya Rihayî bî. Dimayê eşkerayîya çapemenîye, ma Gulbaran Orgun pey xo de dî û demêk aye dir qisey kerd. Aye ma rê pare kerd ke aye çiqas Rayberê Şarê Kurdî Abdullah Ocalanî ra hes kena, çiqas wazena ey dir pêvînayîş bikero û muhîmîya nê eşkerayîyanê çapemenîye çi yo ma rê par kerd. Dima ra aye dest bi qalkerdişê têkoşînê xo yê hemverê problemê ewroyîn ê kurdan kerd. Ma zî nê sanîyeyan qeyd kerd.   ‘Hevalê mi tewrê têgêrayîşî bîyî, labelê mi zewicnayî’   Gulbaran Orgun bi axînêke kûr behsê cuya xo kerde. Gulbaran Orgun babîyê xo sey merdimêko zaf zordar ke şîdet aye rê kerdêne biname kerd û va, “Babîyê mi merdimêko zaf zordar bi. Ey her tim şîdet kerdêne semedo ke ez fek têkoşînî ra veradî; ey keye mi rê kerd zîndan. Ey her tim verê mi de vindertêne, rayîr vernîya mi de girewtêne ke ez nêşêrî. O wext, waştişê mi yê tena o bî ke ez hevalanê xo dir tewrê têkoşînî bîbî. Ma hîrê heval bî û ma pêro waştêne ke pîya şêrê. Ê şî, la ez nêeşkaya. Demo ke ez 17 serre bîya, babîyê mi mi zewicna.”   ‘Şima mi biveşnê zî ez fek nê rayîrî ra veranêdana’   Gulbaran Orgun, ke dîyar kerd dimayê zewacî zî şîdetî ra nêxelisîyaya, va, “Xesûya mi zî her tim mi rê şîdet kerdêne. Rojêk çin bî ke mi şîdet nêdîne. Semedê tutanê xo ez nêeşkaya keye ra vecîyî. Mi semedê tutanê xo pêro çî rê tehemûl kerd. Înan mi ra vatêne, ‘Ti şîyayne şikeftan ke werd înan rê berê, Apocîyan çi bi to kerd?’ Hevalê mi ameyîne dewa ke ez uca de bîya. Mi înan rê vat ke vinderê, ez do werd şima rê bîyarî. Dimayê ke înan werd werdêne û şîyêne, heta siba îşkence mi rê kerdêne. Mi vat, ‘Her çiqas ê bedenê mi biveşnê zî, ez fek nê rayîrî ra veranêdana.’ Her roj îşkenceyê giranan, heqaretê fekî û heqaretê giranan mi rê ameyîne kerdiş.”   ‘Demo ke mi vengê înan eşnawit şîdet vîrê mi ra şî’   Gulbaran Orgun qetî kerd ke aye têkoşînê xo de israr kerda û peynî de mêrdeyê xo zî rêxistin kerda û wina zêd kerd: “Dima mi mêrdeyê xo zî rêxistin kerd. Demo ke o şîyîne partî, mi ra persayêne çira ez nêameya. Demo ke mi ey ra vat ke mi waştêne wextê xo de şêrî hêrs bîne, labelê nika waştêne ez şêrî. Ez her tim şîyîne qezaya Sîlopîyaya Şirnexî. Heta şinawitişê vengê înan zî mi zaf weş dayîne hîskerdiş. Ez bi şewe wuştêne cilan bişuyî û demo ke mi fenerê înan dîyayne, ez keyfweş bîyene û mi vatêne, ‘Wa ez qurbanê feneranê înan bî.’ Demo ke mi vebgê înan şinawitêne şîdeto ke mi rê amebî kerdiş vîrê mi ra şîyîne.”   ‘Çira Serekîya ma azad nêkenê?’   Gulbaran Orgun dîyar kerde ke prosesê “Aştî û Cimatê Demokratîk” ke 27ê Sibate de dest pêkerdo, nêzdîyê serrêkê yo domîyeno û va, “Ma her tim rayberê xo dir ê û ma tu dem fek rayîrê xo ra vera nêdanê. Ganî ê hewl nêdê ke bi qalkerdişê aştîye ser o ma bixapênê. Serrêk o yeno vatiş ke do Serekîya ma azad bikerê. Çira azad nêkenê? Eke ê nêwazenê kurdan dir werey bêrê, çira aştîye ser o qisey kenê? No zî xêrcê zûran çîyêk bîn nîyo. Tiryak rotoxî û dizdî pêro teber de yê, eynî wextî de pêro tepişteyê ma yê sîyasî zî zîndan de yê.”