‘Zerrîya ma Xerzan de dana piro’ 2025-12-16 11:13:59   Rozerîn Gultekîn   WAN - Heşt serrî dimayê hêrişê Goristanê Xerzanî serî, zafê nê cenazeyan hema zî nêdayê keyeyanê înan. Dayîkê Aştîye derheqê hêrişî de vatî, “Çi kenê wa bikerê, zerrîya ma înan dir a û Xerzan de erzena.”   Goristanê Xerzanî ke taxa Olaka Corîne ya Bêdlîsî de yo, hêrişêk mabêne 8-17ê kanûna 2017ine de ame rijnayîş. 267 cenazeyê endamananê PKK’yî 19ê kanûne 2017ine de goristan ra ameyî vetiş. Demêko derg, cayê cenazeyan nêdîyar bî, labelê 2ê çeleyê 2018ine de, eşkerayîyêke hetê Walîtîya Bêdlîsî ra ameye dayîş ke cenazeyî şirawitê Sazgehê Tiba Edlî (ATK) yê Stenbolî.   Heşt serrî hêrişî ser o derbas bi   Vecîya meydan ke cenazeyî, dimayê demêk Sazgehê Tibê Edlî de ameyê girewtiş, beşê ke semedê kesanê nêzanayeyan Goristanê Kilyosî yê Stenbolî de ameyê visnayîş, ameyê nimitiş. Keyeyê ke waştêne heskerdoxê xo bigîrê, numûneyê gonî dayê. Pêwa ke heşt serrî derbas bîyo zî, zaf cenazeyî hema zî nêameyê girewtiş.   Cenazeya Dîlane dimayê 61 rojan ameye teslîmkerdiş   Babîyê Dîlan Bingol Lezgîn Bîngol yê şerwane YPJî ke serra 2014ine de xoverdayîşê Kobanî de dinyaya xo bedelnaye û cenazeya aye zî eynî goristan de ame nimitiş, dimayê ke waştişname Walîtî û leşkeran rê kerd, musa ke cenazeyan şirawitê Sazgehê Tiba Edlî yê Stenbolî. Cenazeya Dîlan Bingol dimayê 61 rojan netîceyê têkoşînê keyeyî de ameye teslîmkerdiş û cayê ci yê dayîkbîyayîşî Tetwanê Bêdlîsî de ameye nimitiş.   Dimayê serrêke cenazeya Celal Ovmen ameye definkerdiş   Mîyanê cenazeyanê ke dimayê hêrişî berdî Sazgehê Tibê Edlî yê Stenbolî zî yê Celal Ovmen estbî. Cenaze 5ê sibata 2018ine de keyeyê ci rê ameye dayîş. Keye cenaze arde dewa Sîpana Jerîne ya qezaya Adilcewazî ya Bêdlîsî ke keye uca de ciwîyayîne û uca newe ra ame nimitiş.   10 Cenazeyî Ameyê Dayîş   12ê kanûna 2019ine de, 11 keyeyan semedê girewtişê cenazeyanê merdimanê xo muracatê Serdozgerîya Pêroyî ya Stenbolî kerd. Serdozgerîya Pêroyî qerar da ke cenazeyan bidê keyeyanê înan. Keyeyan dima ra belgeyê laziman pêşkêş kerd. Dimayê ke proses qedîya, keyeyî 13ê kanûne 2019ine de şî Goristanê Bêkesan ê Kilyosî. Cenazeyê ke bi DNAyî ameyî dîyarkerdiş, tena 10ê înan keyeyê înan rê ameyî dayîş. Bi sebebê ke belgeyê lazimî nêresayê selahîyetdaranê îdareyê goristanî, cenazeya Huseyîn Doner (Sîdar Sîpan) nêdayî keyeyê ci. Cenaze dimayî 28ê sibata 2020ine de cenazeya Cengîz Demîr (Samî) dir keyeyê ci rê teslîm kerdî.   Di serrî dimayê DNAyî cenaze teslîm kerdî   23ê temmuze 2020ine de, cenazeya Faydan Yeşilırmak keyeyê ci rê ameye dayîş. Faydan Yeşilırmak, ke serra 2014ine de bajarê Kobanî de şerê hemverê DAIŞî de dinyaya xo bedelnaye, di serrî dimayê ke numûneyê DNAyî ame dayîş bi DNAya orîjînal pê kerd, Goristanê Yayla yê Hapipler ê qezaya Sultangazî de ameye nimitiş.   Leyla Kaya   Cenazeya Leyla Kaya 9ê sibata 2021ine de, dimayê pêgirewtişê DNAyî bi numûneyê ke hetê dayîka ci Halîde Kaya ra ame dayîş, ameye teslîmkerdiş.   Dayîkê Aştîye 8ine serrgêra hêrişo ke Goristanê Xerzanî ser o de bî qisey kerdî.   ‘Gonîya tutanê ma Xerzan de ya’   Dayîka Aştîye Mewlude Azan, dîyar kerd ke înan bêhurmetîyê hemverê merdan qebûl nêkenê û hêrişî nêexlaqî vînenê û va, “Demo ke ma reya yewine hêrişo ke Garzanî ser o bîyo şinawit, zerrîya ma deja. Ez hêrişanê merdan ser o şermezar kena. Înan merdeyanê ma ra tersenê, nê semedî ra înan nê hêrişî kerd. Çi bikerê wa bikerê, zerrîya ma înan dir a û Xerzan de erzena. Gonîya tutanê ma Xerzan de ya. Xerzan her tim ma rê cayê şehadetî yo. Çi beno wa bibo, ma cenazeyê tutanê xo bipawê. Pêwa pêro nê dejî zî ma hema zî aştîye wazenê. Nika prosesêko aştîye dest pêkerdo û ganî dewlete game bierzo. Ganî cenazeyî nê prosesê aştîye de bêrê teslîmkerdiş. Rijîyayîşê gonî vindaryo.”   Pêwa nê pêro dejî zî, aştîye de israr a   Dayîka Aştîye Meryem Demîr zî va, “Ê esteyê tutanê ma ra tersenê. Tena Xerzan de nê, la her cayî de hêrişê merasîmanê cenazeyan kenê. Lajê mi hêrişê kîmyewî de şehîd bi, labelê înan dewa ma ser o akerde û pere waştî. Lazimî bi aştîye est a; eke aştîye bibo, cenazeyî êdî nînê. Ma, sey dayîkî, aştîye wazenê; ma nêwazenê dayîkî êdî bibermê. Mêrdeyê mi zîndan de dinyaya xo bedelnaye û di lajê mi zî şehîd bî, labelê ez hema zî aştî wazena.”