‘Ma bi serekîya xo bawer ê’

2025-12-04 10:36:49


	 

	 

	Nazlican Nûjîn Yildiz

	 

	ÎZMÎR- Cinîyan derheqê Prosesê Komelê Demokratîkî de ercnayîş kerd, helwestê CHP’yî yê hemverê prosesî de rexne kerdî û vatî: “Ma na aştîye semedê heme şaran wazenê. Semedo ke proses serkewte bo, ganî azadîya fizîkî ya Rayberê Şarê Kurdî Abdullah Ocalanî bêro caardene.”

	 

	Dimayê venga “Aştî û Komelê Demokratîkî” yê ke Rayberê Şarê Kurdî Abdullah Ocalanî 27ê Sibate de kerd, xeylê averşîyayîşî qewimîyayî. Komîsyonê Piştîdayîşê Neteweyî, Wayê-Bira Demokrasî Rayberê Şarê Kurdî Abdullah Ocalan dir pêvînayîş kerd û no komelî dir keyfêko gird û hêvîyêka gird awan kerd. Labelê CHP’yî endam nêda komîsyonî û reaksîyonê hemverê nê zî domîyenê. Cinîyan derheqê prosesî û helwestê CHP’yî de ajansê ma rê ercnayîş kerd.

	 

	‘Ma her tim Serekê xo dir ê’

	 

	Nûriye Tekîn ard ziwan ke ganî tepişteyê sîyasî bêrê veradayîş û Rayberê Şarê Kurdî Abdullah Ocalanî lezgîn bireso azadîya xo ya fizîkî. Nûriye Tekîn va: “Ma wazenê aştî pê bêro. Nê problemî bêrê çareserkerdene. Ma wazenê masayêke ser o roşê û problem bêro çareserkerdene. Wa dayîkê ma nêbermê. Wa zerrîya dayîkanê ma nêveşo. Ma nêwazenê tu dayîkî bibermê. Komîsyon şî Îmralî la CHP nêşi. Çira nêşi? Wa ma nêxapênê. Ma heme çîyan vînenê. Şarê kurdî aştî wazeno. Heqê xo wazeno. Êdî bes o. Ma her tim Serekê xo dir ê. Biciwîyo Serekê ma! Ma silamanê xo Îmrali rê şirawenê.”

	 

	‘Şarê kurdî wazeno mîyanê yewîye de biciwîyo’

	 

	Salîha Teklaş va ke ê prosesî ra hêvîdar ê û va:“Şarê kurdî pêwa heme zordarî û zilmî aştî wazeno. Ma aştîyêka bi rûmet û domdar wazenê. Ma aştîyêka ke ma bixapêno nêwazenê. Ma nêwazenê tutê kesî bimirê. Bi serran o dayîkî dej ancenê. Ma aştî wazenê. Dewanê ma veşnayî, tutanê ma qetil kerdî. La ancî zî ma aştî wazenê. CHP nêşi Îmrali. Semedo ke rayanê xo vînî nêkero. Aseno ke dayîkê ke dej ancenê xemê înan de nîyo. Ez înan dawetê merdimayî kena. Wa dayîkê mebermê. Wa başî bêro welat. Şarê Kurdî wazeno mîyanê yewîye de biciwîyo.”

	 

	‘Ma aştî semedê heme şaran wazenê’

	 

	Nufuse Ataç zî va ke venga 27ê Sibate dir gamê muhîmî ameyî eştiş û Abdullah Ocalan semedê aştîye hewldayîşo gird keno. Nufuse Ataç va: “Vatişê Abdullah Ocalanî muhîm ê û ganî goreyê nê game bêrê eştene. Ma bi serekîya xo bawer ê. Ma hetê bînî ra bawer nêkenê. Heta ewro CHP piştîdayîşê prosesî kerdêne. Senî proses dest pêkerde, CHP peyser game eşt. Ma CHP rexne kenê. Ganî her kes wezîfeyê xo bîyaro ca. Ganî no şer peynî bibo. Ma semedê heme şaran aştî wazenê.”

	 

	‘Serekîya ma bingeyêko saxlem wedart’

	 

	Nufuse Ataç tewr peyîn wina va: “Cografyaya ma bi aştîye hewce ya. Ganî aştîyêka domdar bêro kerdiş. Tu kes nêeşkeno ma bixapêno. Ma kurdî êdî sey verî nîyê. Bingeyê ma saxlem o. Serekîya ma bingeyêko saxlem da ro. Nika serkewtişê ma yo. Verê nê prosesî her tim xera kerdêne. La nika nêeşkenê bikerê. Serkewtiş do yê şarê kurdî bo. Ma veng danê heme kesî. Wa destê aştîye hewa de nêmano. Wa her kes semedê tutanê xo hewl bido, wa aştî bêro nê welatî. Wa serekîya ma û heme sîyasetmedarî, tepişteyê sîyasî bêrê veradayîş.”

	 

	‘Do CHP poşman bibo’

	 

	Întîzar Ozel zî eşkare kerd ke şarê kurdî aştî û têduştî wazeno û va: “Ma serekîya xo wazenê. Ma ziwanê xo wazenê. Şarê kurdî zêdeyêr çi wazeno? Heta ewro xeylê averşîyayîşî qewimîyayî. Komîsyon şi Îmrali. Eke CHP hîra bifikirîyayîne do bişîne. Rayê ke danê CHP’yî yê ma yê. Nika zî îtîrazê prosesî kenê? Kam do poşman bibo ma do bivinê. Ê do poşman bibê. Bi rayanê ma uca nêşinenê ro. Ganî heme tepişteyî bêrê veradayîş. Ma aştî wazenê. Ganî lezkî gamî bêrê eştiş.”