Nassera Dutour: Ganî heqîqet vejîyo werte gumabarî bêrê muhakemekerdiş 2025-12-03 10:58:01     Elfazî Toral   MERKEZÊ XEBERAN – Awankerdox û sereka FEM-MED’î Nassera Dutour ard ziwan ke domnayîşê bêcezakerdişê vînîkerdişê bi zorî de rayîrê cigêrayîşê heqîqetî padano û venga pîlkerdişê mîyanneteweyî kerd. Nassera Dutour va: “Ganî dewlet fek vînîkerdişanê bi zorî û zordarîyan ra vera bido, gumanbaran lezkî muhakeme bikero.”   Têgêrayîşê Cinîyan ê Azad (TJA), Federasyonê Ewropa Akdenîzî yê Hemverê Vînîkerdişê Bi Zorî (FEM-MED), Komeleya Heqê Merdiman (ÎHD), Komeleya Demê Cinîye, Merkezê Vîrî, Komeleya Piştîdayîşê Keyeyê Xizmê Xo Vînî kerdê yê Anatolyayî (ANYAKAY-DER) û Komeleya Hetkarî, Piştîdayîş û Yewîya bi Keyeyê Kesanê Merdimanê Xo Dergûşa Şaristanîyan De Vînî Kerdê (MEBYA-DER) 29-30ê teşrîna peyêne de Harbîye de panelêk viraşt. Panel di rojî domîya û xeylê pawitoxê heqan, merdimê vînîbîyayeyan, Dayîkê Aştîye, rêxistinê cinîyan û Lubnan, Mîsr, Sîrbîstan, Cezayîr, Fas û Lîbya ra zî akademîsyen û aktîvîstî tewrê panelî bîyî.   Derheqê babete de awankerdox û sereka Federasyonê Ewropa Akdenîzî yê Hemverê Vînîkerdişê Bi Zorî (FEM-MED) û aktîvîsta heqê merdiman a Fransa-Cezayîrî Nassera Dutour qisey kerd û eşkerayîye daye ke ganî hemverê vînîkerdişê bi zorî têkoşîno hempar bêro kerdiş.   Tirkîya de têkoşînê semedê raştîye est o   Nassera Dutour eşkerayîye da ke xoverdayîşê Dayîkê Aştîye numûneyêko muhîm o û wareyê têkoşînî de zaf aver şono û va: “Tepiştişê heqîqetê vînîbîyayîşî û qetilkerdişî de zaf zehmet o. Hemverê qetilkerdişan cigêrayîşê heqîqetî û problemê nê xeylê welatan de yeno ciwîyayîş. Çîyê ke Tirkîya de bala mi ant no yo ke piştîdayîşêko zaf xurt est o. Têgêrayîşê cinîyan, keyeyê vînîbîyayeyan, sazîyê komelê sîvîlî na babete de têkoşînê gird kenê. Tirkîya de têkoşînê cîyayî semedê heqîqetî yenê têhet. Cezayîr de têkoşînê rêxistinkirdeyê wina çin o. Çi heyf merdimê vînîbîyayeyan tenya yenê verdayene, bi guman ewnîyenê û komelê sîvîlî piştîdayîşêko hempar nîşan nêdanê. Nê kesan sey terefgirê terorîstan vînenê, dewlete ra tersenê. Werrekna tîya zî têkoşîno hempar biameyîne domnayîş.”   Pêwa zordarî û destbendkerdişan xoverdayîş   Nassera Dutour dîyar kerde ke lajê aye 1997ine de bi zorî ameyo vînîkerdiş û va: “Ez 1998ine ameya Tirkîya. Bi dawetkerdişê Rêxistina Efûya Mîyanneteweyî ameya û mi tîya Dayîkê Şemîye nas kerdî. O wext Tirkîya de zordarî zaf bîyêne. Pêwa zordarî û destbendkerdişan têkoşînê dayîkan tesîrêko gird mi ser kerd. Ma ziwanê yewbînan nêzanayêne la ê dayîkan dir zî fotograf estbî, dayîkê Cezayîrî dir zî bî. Ma şibîyayîne yewbînan. A roje ra ez muhîmî dana piştîdayîşê mîyanneteweyî.”   ‘Ez welatê xo ra ameya dersînor kerdene’   Nassera Dutour dîyar kerde ke 2019ine Cezayîr de semedê têgêrayîşê komelî, dedtbendkerdiş, tepiştiş, kerdişê xirabî, îşkence û zordarî qewimîyêne û hemverê nê de têgêrayîşê komelî zaf qels bîyê. Nassera Dutour va: “Balkêş o la çalakîyê Cezayîrî tenya dayîkê vînîbîyayeyan domnaye. Her çarşeme pêwa heme çîyan qerardarîya xo domnayêne. Aşma temmuze de demo ke Fransa ra ez şîyêne Cezayîr ez ameya destbendkerdiş û dersînorkerdiş. Nika nêeşkena şêrî welatê xo. Dûrî ra zî ganî ma hemverê nê hedîseyan de têkoşîn bikerê. Piştîdayîşê mîyanneteweyî semedê têkoşînî ferz o. Ganî dewlete fek vînîbîyayîşê bi zorî û zordarîyan vera bido, gumanbaran lezkî muhakeme bikero. Ganî raştîye bîyaro meydan.”