Peykerê ‘Cinîyê Têkoşerî’ dîyarî pêro cinîyan rê ame kerdiş

2025-11-26 14:51:43


	 

	 

	AMED – Şaredarîya Peyasî Parka Medyayî de peykerê cinîyêka ke sey sembolê xoverdayîş, têkoşîn û azadîya cinîyan yena tarîfkerdiş, bi merasîmêk akerd. Hemşaredara Peyasî Bêrîvan Sîncar va ke ma nê peykerî cinîyan rê diyarî kenê.

	 

	Şaredarîya qezaya Peyasî ya Amedî, Parka Medyayî de peykerê cinîyêka ke sey xoverdayîş, têkoşîn û azadîya cinîyan yena tarîfkerdiş, viraşt. Peyker bi merasîmêk ame akerdene. Hemşaredara Peyasî Bêrîvan Sîncar û xeylê xebatkarê cinî yê şaredarîye tewrê merasîmê akerdişê peykerî bî.

	 

	Hemşaredara Peyasî Bêrîvan Sîncar qisey kerd û dîyar kerd ke înan semedê 25ê Teşrîna Peyêne Roja Têkoşînê Hemverê Şîdetê Cinîyan ê Mîyanneteweyî xeylê xebatan organîze kerdê û va: “Hetê şaredarîyanê Partîya DEMî ra 90 ra zêdeyêr merkezê cinîyan ameyî akerdene. Xebatê ma do semedê cinîyan dewam bikerê. Goreyê dayeyan serra 2024ine de 80 hezar cinî ameyî kiştiş. No dayeyê kiştişê cinîyan heme çî mojneno. Ma sey cinîyê têkoşer ma do xoverdayîşê xo her wareyî û her demî dewam bikerê. Ma nê peykerî heme cinîyan rê diyarî kenê. No peyker; sembolê cinîyanê têkoşeran o.”