Ayşegul Dogan: Ganî şîyayîşê Girawa Îmraliyî erey nêkewo 2025-11-07 15:26:41   ANQARA - Verfeka DEM Parti Ayşegul Dogan derheqê kombîyayîşê Heyetê Îdareyê Merkezî yê DEM Partiye de qisey kerd û va ke derheqê veradayîşê tepişteyê dewaya Kobanê de averşîyayîşêk newî çin o, ê zî paweyê veradayîşê înan ê û derheqê şîyayîşê komîsyonî semedê Girawa Îmraliyî zî va ke lazim o komîsyon pêvînayîşê bi Abdullah Ocalanî dir erey nêfîno.   Verfeka Partiya Têduştî û Demokrasî (DEM Partî) Ayşegul Dogan derheqê kombîyayîşê Heyetê Îdareyê Merkezî (MYK) de merkezê pêroyî yê partiya xo de eşkerayîye da. Ayşegul Dogan derheqê netîceya kombîyayîşê Heyetê Îdareyê Merkezî û averşîyayîşanê rojeve de va ke înan zaf babetanê rojeve de munaqeşe kerdê û wina va: “Demêk derg o ke kombîyayîşan organîze kenê. Vizêrî ma reyke bîn destbendkerdişê rojnamegeran dir dest bi rojeve kerd. La waştî ke nê sey nêbîyayîşê destbendkerdişî bimojnê. No zî mojneno ke sîyaset tesîrêko senî serê hûqûqî de keno. Lazim o nê caardişê hemverê demokrasî biqedê. Ma do pawitişê demokrasî û heqê girewtişê agahîyan ê şarî bipawê û mîyanê piştîdayîşî de bê.”   Ayşegul Dogan bale ant ser qerarê Dadgeha Heqê Merdiman ke derheqê Selahattîn Demirtaş û dewaya Kobanê de û wina qisey kerd: “Na dewaya dewayêka heyfgirewtişî bî, dewayêka sîyasî bî û hûqûqî dir tu têkilîyê xo çin bî. DMEyî zî wina qerar da. La hende dem vêrîya û hevalê ma hema zîndan de yê. Lazim o gamanê ke hûqûqî bica bîyarê, bêrê eştiş. Ma zî pawe yê. Wezaretê Edaletî serê persîyayîşê rojnamegeran de va ma paweyê ke dosya bêro dadgeha herêmî, la çend rojî vêrtî hevalê ma hema nêameyî veradayîş. Paweyê çi yê? Paweyê çi yê ma nêzanê la yê ke ganî pawe bimanê caardişê hûqûqî yo. Awankerdişê aştî û demokrasîyêk komelî zî bi viraştişê hûqûqî virazîyeno. Ma zî paweyê yê ke hevalê ma lezkî bêrê veradayîş.” Ayşegul Dogan dewamîya qiseykerdişê xo de nameyê sîyasetmedaranê ke dewaya Kobanê de tepişte yê qal kerd û va ke tena tepişteyê dewaya Kobanê nê, heme tepişteyê sîyasî ganî bêrê veradayîş.   Ayşegul Dogan serê persê ke çira komîsyon xebatanê xo hêdî domneno û pêvînayîşê Rayberê Şarê Kurdî Abdullah Ocalanî dir erey keno zî va ke nêbeno ke komîsyon bi muxatebê sereke dir pêvînayîş nêkero. Ayşegul Dogan va ke ganî şert û mercê Abdullah Ocalanî zî bêrê vurnayîş û bi şert û mercanê azadan de xebatanê xo bidomno. Ayşegul Dogan serê persê veradayîşê tepişteyê dewaya Kobanê de zî va ke ê paweyê mijdanîyêkê û lazim o hûqûq zî erey nêkewo û qerarê veradayîşê tepişteyê dewaya Kobanê bica bêro. Ayşegul Dogan va ke derheqê veradayîşê Selahattîn Demirtaş û tepişteyê dewaya Kobanê de averşîyayîşêkê newî û çîyêk ke înan rê ameyo vatiş çin o û ê zî pawe yê û wazenê ke hevalê înan bêrê veradayîş.”