‘Mifteyê prosesî azadîya Abdullah Ocalanî yo’

2025-10-22 10:42:30


	 

	Buşta Turan

	 

	WAN - Cinîyê TJAyî ke bi sloganê “Ma bi hêvî ver bi azadîye şonê” rayîr ra şîyî, wina vatî: “No rayîrşîyayîş nê reaksîyonêk spontanî vet werte. Na gamêka rêxistinkerde ya xoverdayîşê bi serran ame munayîş a. Bi taybetî qerardarî û tecrubeyê tarîxî yê têgêrayîşê cinîyanê kurdan ancî mojna. Ma cinî semedê viraştîşê aştî û azadîye bi qerardarî nê têkoşînî domnenê.”

	 

	Bi serkêşîya Têgêrayîşê Cinîyanê Azadan (TJA), cinî ameyî têhet û 1ê Teşrîna Verêne de Amed ra ver bi Anqarayî bi sloganê “Ma bi hêvî ver bi azadîye şonê” rayîrşîyayîş dest pêkerdî. Cinîyan 7ê Teşrîna Verêne de Anqara de rayîrşîyayîşê xo peynî kerdî. Cinîyan meclîs de bêmabêne sloganê “Bijî serok Apo” berz kerdî û waştişê azadîya fîzîkî ya Rayberê Şarê Kurdî Abdullah Ocalanî kerdî.

	 

	Aktîvîstê TJAyî Hatîce Oktay û Zeynep Durmazî ke rayîrşîyayîşî de cay girewtî, derheqê rayîrşîyayîşî de qisey kerdî.

	 

	‘Vindertişêk kolektîf ame mojnayîş’

	 

	Hatîce Oktay armancê rayîrşîyayîşî wina qal kerd: “No rayîrşîyayîş bi sloganê ‘Ma bi hêvî ver bi azadîye şonê’ dest pêkerd. Armancê ma caardişê azadîya fîzîkî ya Abdullah Ocalanî bî. Bi nê waştişî ma rayîr ra şîyî. Yew hedefanê bînan ê rayîrşîyayîşî no bî ke têkoşînê azadîya cinî bêro dîyayîş. Eynî wextî de ma waşt ke hemverê zordarîyanê serê îradeyê cinîyan vindertişêk yewgirewte bimojnê. Ma waşt ke bi nê rayîrşîyayîşî felsefeya ‘Jin, jiyan, azadî’ biresnê her cayî.”

	 

	‘No rayîrşîyayîş qerardarîyê têgêrayîşê cinîyanê kurdan mojna’

	 

	Hatîce Oktay dîyar kerd ke rayîrşîyayîş bi kedêk kolektîf ameyo kerdiş û wina dewam kerd: “Cinîyê ke bajarê bînan ra ameyî têhet, xo rêxistin kerdî û her sewîya de pê dir têgêrayî. Hîn cinîyan roja verêne ra heta peynîye dewam kerd. Hîn bajarê bînan ra tewrê kortejî bî. Heme cinî hemkarê nê rayîrşîyayîşî bî. No rayîrşîyayîş reaksîyon nêbê ke spontane vejîya. Na gamêka rêxistinkerde ya xoverdayîşê bi serran ame mûnayîşî ya. Bi taybetî qerardarî û tecrubeyê tarîxî yê têgêrayîşê cinîyanê kurdan reyna mojna. Ma cinî semedê viraştîşê aştî û azadîye bi qerardarî nê têkoşînî domnenê.”

	 

	‘Pêwa astengîyan îrade nêame şikitiş’

	 

	Hatîce Oktay eşkera kerd ke seranserê rayîrî de astengîyan dir rî bi rî mendê û wina va: “Wext bi wext polîsan mudaxale kerd la nêeşkayî îradeyê ma bikişê. Ma tîya de her cayî de pêvînayîşê cinîyan kerd. Ma eşkerayîye da. Ma deyîran vat, govende kerd. Ma cinîyan dir ameyî têhet. Ma cinîyan dir sohbet kerd û hîkayeyanê înan goşdarî kerd.”

	 

	‘Ma bi qerarê têkoşîn bidomnê’

	 

	Hatîce Oktay peynîya qiseykerdişê xo de wina va: “Armancê ma caardişê azadîya fîzîkî ya Abdullah Ocalanî yo. Abdullah Ocalan mifteyê aştîye yo. Hedefa ma no yo ke ma na mesele de hişyarîyêk virazê û nê hişyarîyî biresnê heme cinîyan. Ma wazenê sloganê ‘Jin, jiyan, azadî’ biresnê zafêr cinîyan û meclîsanê herêmî yê cinîyan zafêr rêxistin bikerê. Birêz Ocalan mifteyê aştîye yo. Ganî lezkî semedê azadîya ci game bêrê eştiş. Derheqê nê de têkoşînê ma do dewam bikero.”

	 

	‘Cinî azad nêbê, cemat zî azad nêbeno’

	 

	Zeynep Durmaz zî bale ant ser muhîmîyê rayîrşîyayîşî û têkoşînê cinîyan û wina va: “Ma semedê azadîya serekî bi sloganê ‘heqê hêvîye’ rayîrşîyayîş dest pêkerd. Heta ke azadîya fîzîkî ya Birêz Abdullah Ocalanî virazîyo, têkoşînê ma do dewam bikero. Rolê ke Abdullah Ocalanî da cinîyan dîyar o. ‘Cinî azad nêbê, cemat zî azad nêbeno’. Ma zî bi serkêşîya cinîyan, bi hişyarîya cinîyan nê rayîrşîyayîşî organîze kerd. Ma do bi hişyarîya cinîyan bi rêxistinbîyayîş têkoşînê xo heta ke azadîya fîzîkî ya serekê virazîyo dewam bikerê. Dîyayîşê hêzê cinîyan meydanan de kêfweşîyêk girde yo. Cinî ameyî têhet û semedê azadîya fîzîkî ya Abdullah Ocalanî vengê xo berz kerdî. No kêfweşîyêk girde yo. Ma do têkoşînê xo heta peynî dewam bikerê.”