Abdullah Ocalan: Ganî awankerdişê huqûqî yê entegrasyonê demokratîkî bibo

2025-10-17 14:46:35


	 

	 

	MERKEZÊ XEBERAN- Rayberê Şarê Kurdî Abdullah Ocalanî wina va: “Pêmawitişê heqê hêvîye ser ganî dewlete game bierza. Ganî nê barî wedaro. Na yewe meseleyêka ke tesirê hezaran merdiman kena. Senî bierceno wa biercno, ganî na yewe bêro wedaritene. Hetê huqûqî ra ganî no bêro kerdene.”

	 

	Buroyê Huqûqî yê Asirînî derheqê ziyaretê 13ê teşrîna verêne 2025î yê Îmraliyî ke bi Rayberê Şarê Kurdî Abdullah Ocalanî û tepişteyê sîyasî yê bînan ê pêvînayiş kerdo, eşkerayîyêke weşanaye.

	 

	Eşkerayîya Buroyê Huqûqî yê Asrinî wina ya:

	 

	Eşkerayîye de wina ame vatene: “Ma 13ê teşrîna verêne 2025î de Girawa Îmraliyî de bi Birêz Abdullah Ocalanî û muwekîlanê xo yê bînan ma sey awûkatanê înan pêvînayiş kerd. Nê ziyaretî de derheqê şert û mercanê muwekîlanê ma û halê înan o huqûqî de ma qisey kerd, zanayîşî dayî û girewtî. Na wesîla ra ma wazenî ke ercnayîş û fikranê Birêz Ocalanî yê serê awankerdena aştîye de raya pêroyî reyde pare bikerî. Pêvînayişî de halê huqûqî yê Birêz Ocalanî, çarçeweya qerarê heqê hêvîye yê Mehkemeya Heqanê Merdiman a Ewropa de bi yew babetanê sereke û muhîman ê munaqeşeyî. Senî ke yeno zanayene, Komîteya Wezîran a Konseya Ewropa roniştışê xo yo peyên ê 15-17ê Êlûle ra dima reyna vengê Tirkîya da û ci ra waşt ke heqê hêvîye goreyê qerarê Mehkemeya Heqanê Merdiman a Ewropa bi hawayêko qanûnî çare ser bikero.

	 

	Na bingeyî ser o Birêz Ocalanî îşaret kerd ke pîvana heqê hêvîye zaf muhîm û esasî yo. Dewam de va; ‘Pîvana hêvîye gameyêka ke ganî dewlete bierza. Ganî nê barî wedaro. Na yewe meseleyêka ke tesirê hezaran merdiman kena. Senî biercno wa biercno, ganî na yewe bêro wedaritene. Hetê huqûqî ra ganî na bêro kerdene. Sîyaset zî, edalet zî ney ferz kenê’. Bi nê hawayî hewcedarîya huqûqîye arde verî.

	 

	Çarçeweya vengdayîşê Aştîye û Komelê Demokratîkî yê 27ê Sibate de da eşnawitene ke ganî pêro bawerî û mezhebî bışêrê bi hawayêko xoser xo îfade bikerê, hem zî heqê her kesî est o ke neteweya xo îfade bikero û bi hawayêko xoser biciwîyo. Ard ziwan ke ganî kurdî bi yewbîyayeyî mîyanê huqûqî de ca bigêrê û va; aştîya esase na ya bi xo ya. Eşkera kerd ke huqûqê kurdan heta nika çin hesibîyayo, teberê huqûqî de mendê, la ganî êdî huqûqê entegrasyonê demokratîkî bêro awankerdene.

	 

	Wexto ke teberê huqûqî de mendiş û tepiştişo fikrî û zîhnî nercna, nê tespîtî kerdî; ‘Cuye wexto ke xoser a, mana xo est a. Mi verê cû zî vatibi. Ey cuye! Ya ez do to bi hawayêko xoser biciwîya, ya zî ez do to qet nêciwîyaye bihesibna. Motoya mi ya cuye na ya, şîarê mi no yo’.

	 

	Tespîtê Birêz Ocalanî yeno zanayene ke vato, bingehê pirsgirêkanê sîyasî û komelkîyan de nêseyyewbînanîya cinî û camêrdî est a. Îşaret kerd ke çareserîya na nêseyyewbînanîya bi pratîkê cuya xoserîya cinîye û fikrêko sosyalîst mumkîn a. Ard ziwan ke o karanê Jineolojî ra nezdi teqîb keno, zaf ercîyaye vîneno û silamanê xo yê taybetan pêro cinîyan rê, tepişteyanê zîndanan rê erşawitî. Ê kesê ke wazenê ey fam bikerê dawet kerdî ke nê prosesê aştîye û komelê demokratîkî xorînî bikerê û tewrê prosesî bibê. Eşkera kerd ke karê seba xoserîye hetê averberdene û caardişê prosesî ra muhîm o.”