‘Waştişê ma aştîyêk adîlane, têduştî û azad o’

2025-09-12 11:29:34


	 

	 

	Elfazî Toral

	 

	STENBOL - Semra Yildiz û Cemîle Çelebî dîyar kerdî ke ê pêwa pêro dejan ke ameyê ciwîyayîş do waştişê aştîye dewam bikerê.

	 

	Bi vengdayîşê ‘Aştî û Komelê Demokratîkî’ yê Rayberê Şarê Kurdî Abdullah Ocalanî dir gamê çareserîya bi metodê demokratîkî yê semedê meseleya kurdî ameyî eştiş. Koma Aştî û Komelê Demokratîkî çarçeveya prosesî de merasîmê veşnayîşê çekan pê ardî. Proses dewam keno û keyeyê kesê ke prosesê pêrodayîşî de dinyaya xo bedelnayî destek danê proses. Dayîka Kava Çelebî ke dinyaya xo bedelnaye Cemîle Çelebî û Semra Yildiz ke mêrdeyê aye tewrê PKK’yî bî, dîyar kerdî ke pêwa pêro dejê cuya înan, do waştişê aştîye dewam bikerê.

	 

	Semra Yildiz dîyar kerd ke serra 1990î de Kerboranê Mêrdînî de ciwîyayîne û her tim zextê dewlete dir ameyî rî bi rî û va: “Dewlete her roje eştêne keyeyê ma ser. Dewlete xeylêk rey şîdet mêrdeyê mi Galîp Dagî rê kerdêne. Ez hema di serrî zewicnaye bîya, mêrdeyê mi teda rê dayax nêkerd û tewrê PKK’yî bi. A roja ra nata ma agahî ey ra nêgirewt. Babîyê mi zî tepişnayî. Çend serrî tepişte mend. Tutê mi qij bî. Kesêk ma çin bî. Ma ameyî Stenbol. Ma bi zor ameyî koçberkerdiş. Ma uca şuxilyayî. Bi 13 serrî yo ma Stenbol de yê. 2 laj û kênayêk mi est ê. Babîyê xo qet nêdîyî. Wextê ke şi tutî qij bî.”

	 

	'Ma şahidê zextan ê'

	 

	Semra Yildiz dîyar kerd ke vengkerdişê dewan de qorîcîtî înan rê ameya ferzkerdiş û va: “Semedo ke ma qebûl nêkerd, hêriş kerdêne. Ma şahidê hêrişan ê. Ma aştî wazenê. Canê ma zaf veşa la ma nêwazenê canê yewî bivînî biveşo. Ez dewlete ra bawer nêkena, durist nîyê. Ma aştiyêk bi rumet wazenê. Ma aştîyêk kes nêmiro wazenê. Wa ê ke ko de yê agêrê keyeyê xo. Wa heqê înan bidê înan.”

	 

	‘Lajê mi şehîd kewt’

	 

	Cemîle Çelebî zî dîyar kerd ke semedê zextê dewlete koçber bîyê û wina va: “Ma dewa xo de bî.  Dewlete her roje eştêne keyeyê ma ser. Tutê mi zextan ra nêameyîne keye, sey mahkuman bî. Îşkence mêrde û xezurî rê mi rê kerdî. Xeylêk merdimê ma semedê zextan şî koyan. Ma dewe ra ameyî Kerboran. Dewlete uca de zî rehetî nêda ma. Îşkence kerdêne. 30 serrî yo Stenbol de ciwîyena. 4 tutê mi est ê. Lajê mi tewrê PKK’yî bi û şehîd kewt. Dewlete cenazeya lajê mi nêda.”

	 

	‘Wa kes dej nêanco’

	 

	Cemîle Çelebî tewr peyîn wina va: “Ma aştîyêk têduştî, azad û adîlane wazenê. Pêwa dejo ke ma anto, ma vanê aştî. Ez tirkî nêzana. Tutê ma şinê dibistane ziwanê xo xo vîr ra kenê. Ma wazenê tutê ma bi ziwanê xo perwerde bivînê. Ma zî sey şarê bînî wazenê wayîrê heqî bê û bi ziwanê xo qisey bikerê. Wa tu kes dej nêanco.”