Şaredarîya Yenîşehîrî ra Rojê Kultur û Hunerî 2025-09-11 11:22:44     Şehrîban Aslan   AMED- Hemşaredara Yenîşehîrî Safiye Akdag derheqê festîvala ‘Rojê Kultur û Hunerî’ yê mabêne 12-13-14ê êlule de do pê bêro veng da û va: “Ganî ma şarê xo dir bêrê têhet û ma moral bigîrê. Ma  her kesî dawetê konseran kenê.”   Kuçeyê Hunerî yê Ofîse ke girêdayeyê qezaya Yenîşehîrî ya Amedî yo, semedê polîtîkayê taybet yê şerî caardişê tiryakî û fuhuşî zêde bî. Şaredarîya Yenîşehîrî ya Partîya Têduştî û Demokrasî (DEM Partî) semedê Kuçeyê Hûnerî bireso rengînîya xo ya verê do mabêne 12-13-14ê êlule de festîvala ‘Rojê Kultur û Hunerî’ pê bîyaro. Hemşaredara Yenîşehîrî Safîye Akdag derheqê festîvale de qisey kerd û va, ê bi na festîvale wazenê kuçe bireso renginîya xo ya verê.   ‘Ma do kuçe biresnê rengînîya verê’   Safîye Akdag dîyar kerd ke no demêk derg o ke waştê Kuçeyê Hunerî de festîvale organîze bikerê û va: “Sebebê ma estbî. Kuçeyê Hunerî û Ofîsî de polîtîkayê şerê taybetî pê yenê. Ciwan û tutî çi heyf ver bi cuyêka pûçe de şinê. Ma soz da şarê xo. Ma do mabêne 12-14ê êlule de saete 12ine de bi nawitgehê resiman dest pê bikerê. Ma do resimanê serkêşê têkoşînê cinîyan abikerê.”   Tîyatro û atolye   Safîye Akdag dîyar kerd ke do festîvale hîrê rojî dewam bikero û va: “Ma do çend kafeyan de atolyeyan pê bîyarê. Hemverê şîdetê cinîyan ser, hemverê tiryakî do atolyeyê ma bibê. Ma do standan abikerê û nê standan de do sazgeh û komele xo bidê nasnayîş. Do di konser û tîyatroyêk zî bibo. Tîyatroyê bi nameyê Hinek Henek bibo. Ciwanî nê tîyatroyî ra hes kenê.”   Di konserî do bêrê dayîş   Safiye Akdag tewr peyîn wina va: “Do Koma Hevra konser bido. Roja peyîn de zî do Hamît Karadenîz konser bido. Do semedê tutan zî bername bibê. Ma pêro şarê xo dawet kenê. Armancê ma oyo ke ma şarî dir bêrê têhet û moral bigîrê.”