Havva Kiran: Eke şima vanê do aştî bêro ganî şima gaman bierzê

2025-08-23 12:39:40


	 

	 

	AMED - Dayîka Aştîye Havva Kiran reaksîyon vera destûrnêdayîşê kurmancî yê Parlamentoyî de qisey bikerê mojna û va: "Eke şima vanê do aştî bêro, gamanê ver bi ci bierzê.” Havva Kiran bale ant  qedexeyê ziwanê kurdkî, zîndanan, wêrankerdişê xoza û tecrîdê Abdullah Ocalanî ser û qetî kerd ke aştî bi ziwan, edalet û bawerîya hembeş mimkun a.

	 

	Dayîkê Aştîye semedê goşdarîkerdişê dawetê parlamentoyî ameyî kerdiş û qedexeyê kurdkî yê "Komîsyonê Pêgirewtişê Neteweyî, Wayê-Biratî û Demokrasî" de xeylêk hetî ra rastê rexneyan ame. Havva Kıran, yew hîrê Dayikê Aştîye yê komîsyon de qisey kerd û dîyar kerd ke heta ziwanê înan fermî nêbo, qalê aştî nêeşkenê bêro kerdiş.

	 

	'Eke mi bi ziwanê xo qisey bikerdêne, mi do xo hîna zêde îfade bikerdêne'

	 

	Havva Kıran, dîyar kerd ke wexto ke şîyê komîsyon, qiseykerdişê înan yê bi ziwanê dayîke problemê vetê û va: "Parlamentoyî venga komîsyonî da û ma şî. Ma ra vatî, 'tîya kurdkî qedexe ya; nîna qeydkerdiş.' Ma va, 'Baş o, eke wina bo, ganî di kesî bi tirkî qisey bikerê û yew zî bi kurdkî qisey bikero.' Înan nê zî red kerd. Parlamenterê ma vatî, ê eşkenê biaçarnê la ancî nêame qebûlkerdiş. Mi va, 'Ez bi tirkî nêzana, ez nêeşkena xo bi tirkî baş îfade bikerî.' Semedo ke nêvajê, 'Dayikê Aştî ameyî û alozî viraştî,' ma hewl da ke bi tirkî qisey bikerê. Eke mi bi ziwanê xo qisey bikerdêne, mi do hîna baş qisey bikerdêne. Ma semedê xo nêşî uca, ma semedê dejê nê welatî şî. Labelê, eke şarêk bi ziwanê xo nêciwîyo, no yeno manaya ke çin o."

	 

	'Wa gamêke ver bi aştî û aramî bierzê'

	 

	Havva Kiran, muhîmîyê ziwanî semedê xo qetî kerd û va: "Ganî ma ziwanêk ke ewro çinbîyayîşî dir rî bi rî yo, bi kultur û hunerê xo bipawê. Ziwanê ma rûmetê ma yo û ma pê serberz ê. Her ziwanêk dewleta Tirkîya de heqê xo est o, nê semedî ra çira ê ma çin yeno hesibnayîş? Ma her hetê cuya xo de bi kurdkî ciwîyenê, semedo ke no ziwanê ma yo. Dewlete îdia kena ke a dewletêke edalet wazena ya û xo demokrat îlan kena, la gama ke ma vejênê vernîya komîsyonî, aye vernîya qiseykerdişê ma yê kurdkî gêna. Na bawerîya ma xira kena. Eke ê wazenê ma bawer bikerê wa gamêke ver bi aştî û aramî bierzê. Eke game nêrê eştiş, do yew het nêbo.”

	 

	'Heşt aşmî yo tu game nêameya eştiş'

	 

	Havva Kiran, dewam de va: "Ma waştişê vindarnayîşê gonî rijnayîşî kerd. Vanê ke ganî gerîla bêrê, la ê do bi kam ci qanûnî bêrê? Gelo gama ke ê bêrê tîya do zîndanan de bimanê? Gelo ganî cezaya hepsî heta heta înan rê bêro birnayîş? Gerîla demê verê de zî ameyî, la ê aşmêk de ameyî tepiştiş. Eke ê wazenê aştî bîyarê nê welatî, ganî vernê de Birêz Ocalan azad bikerê. Abdullah Ocalan vengdayîşêk kerd û dorê şarê kurdî de havêrêk viraşt. Înan va, semedê her çî amade yê. Şar bawerîya xo bi Birêz Ocalanî ano, dewlete rê nêano. Heşt aşmî yo tu gamê somutî nêameyê eştiş. Ganî komîsyono newe ameyo awankerdiş, Rayber Apo dir kom bibo ke ê kesî bizanê o çi wazeno." 

	 

	Vengdayîşê ma semedê komîsyonî, semedê dewlete, semedê Numan Kurtulmuşî:  Eke şima zerrî ra yê, eke şima bawer kenê ke aştî do bêro, gamêke ver bi aştî bierzê. Wa hêrişê şima vinderê. Wa zîndanî bêrê akerdiş. Wa ziwanê ma bibo ziwanê fermî. Bêrê ma ziwanê xo bipawê. Aştî êdî lazim a; aye sey nan û awe muhîm a. Gonî gonî nêşona, aştî gonî şona. Heta ke ma bibê, ma do aştî biwazê.