‘Bêcinîyan aştî awan nêbena’ 

2025-08-21 10:48:47


	 

	AGIRÎ - Verfeka Têgêrayîşê Cinîyanê Azadan (TJA) Dîlan Başboga dîyar kerd ke cinî awankerdişê "Komelêk Aştîwaz û Demokratîk" do serkêş û aktorê awankerdox ê û va, "Aştî bêcinîyan, demokrasî bêcinîyan mumkin nîya.”

	 

	Dimayê "Vengdayîşê Semedê Aştî û Komelê Demokratîkî" yê Rayberê Şarê Kurdî Abdullah Ocalanî yê 27ê Sibate de, "Manîfestoyê Komelê Demokratîk" 9ê temmuze de bi vîdyoyêk ame weşanayîş. "Koma Aştî û Komelê Demokratîk", ke 30 gerîlayan pê ameyîne ke 15 înan ra cinî bî,  jin merasîmêk ke 11ê temmuze de cayê dewa Silêmanî de ame organîzekerdiş, çekê xo veşnayî. No vengdayîşo ke tesîr pêro beşê komelî kerd, çar hetê dinya de veng da. Tirkîya de demêk ke zext cinîyan ser û xidarîyê ke hetê sîstemê serdestî yê camêrdan ra yenê vetiş, zêde benê. Azadîya cinîyan sey lazimîyêk bingehîn ê awankerdişê "Komelê Aştî û Demokratîk" de vejêno vernî. Eşkerayîya Rayberê Şarê Kurdî Abdullah Ocalanî yê "Komel bê azadiya cinîyan azad nêbeno" muhîmîyê azadîya cinîyan ancî keno.

	 

	Verfeka Têgêrayîşê Cinîyanê Azadan (TJA) ê qezaya Dûtaxî ya Agirî Dîlan Başboga, derheqê rolê cinîyan ê prosesî de erjnayîş kerd.

	 

	'Aştî û demokrasî bêcinîyan mumkin nîya’

	 

	Dîlan Başboga, qetî kerd ke azadîya cinîyan kerraya bingehîn ê xelasîya komelî ya û bale ant serê rolê cinîyan ê awankerdişê komelêk aştîwaz û demokratîk de. 

	 

	Dîlan Başboga va, "Goreyê Abdullah Ocalanî, koletîya yewin cinîyan ser o dest pêkerd, nê semedî ra şorişê tewr kûr zî do cinîyan dir bêro kerdiş. Modelê neteweyê demokratîk beşdarîya çalak ê cinîyan siyasetî ser, pawitişê xo û cuya komelî de yo. Nê semedî ra, rol û mîsyonê cinîyan awankerdişê 'Komelê Aştî û Demokratîk' de muhîm û erj o. Cinî prosesê aştîye de aktorê pasîf nîyê, aktorê awankerdox ê. Awanîyê ke serkêşîya cinîyan de Rojawan û seranserê Kurdistanî ame awankerdiş, nimûneyê verbiçim yê nê çî yê. Rêxistinê sey PAJK, YPJ, TJA û Jineolojî temsîlê pratîkî yê xeta xelasî yê. Nê semedî ra aştî bêcinî nêbena. Awankerdişê 'Komelê Aştî û Demokratîk' de bêcinî no çî mumkin nîyo. Merdim bê xelasîya cinîyan nêeşkenê azad bibê. 'Jin, jiyan, azadî' xerîteya rayîrê nê têkoşînî ya."

	 

	'Ganî cinî prosesî rê serkêşî bikerê’

	 

	Dîlan Başboga dîyar kerd ke cinî tena beşdarîyê "Prosesê Aştî û Komelê Demokratîkî" nê eynî wextî de serkêşîyê ci zî bikerê û dîyar kerd ke nê bi metodê tewir tewir mimkun ê. 

	 

	Dilan Başboga va, "Cinî tena mîmarê xoverdayîşî nîyê, eynî wextî de mîmarê komel û cuyêka newe yê. Verê her çî, ma serdayîşê keyeyan, taxan û dewan kenê ke ma biresê tewr zêde cinîyan. Nê  bingeyî ser, ma semedê xurtkerdişê rêxistinê cinîyan şuxilênê. Ma atolyeyê jineolojî û Îdeolojîya Xelasîya Cinîyan ser organîze kenê. Semedo ke ma biresê  tewr zêde cinîyan, taxan û dewan, kuçeyan û keyan de kombîyayîşê cinîyan yenê organîzekerdiş. Nê kombîyayîşan de bi baldarî fehm û pêşnîyazîyê cinîyan yeno goşdarîkerdiş. Netîce de wareyêk cinîyan ê rêxistinkerde vejêno werte."