
Dayîkê Şemeyî aqûbetê Mehmet Salîm Acarî pers kerdî  

2025-08-16 15:27:18


	&nbsp;

	&nbsp;

	STENBOL - Dayîkê Şemeyî semedê Mehmet Salîm Acaro ke 31 serrî verê Amed de ame vinîkerdiş, çalakîya xo ya 1064ine Meydanê Galatasarayî de organîze kerdî û vengdayîşê caardişê edaletî kerdî.&nbsp;

	&nbsp;

	Dayîkê/Merdimayî Şemeyî 1064ine çalakîya xo ya hewtane Meydanê Galatasarayî de organîze kerdî. Çalakî de aqûbetê Mehmet Salîm Acaro ke 31 serrî verê Amed de ame vînîkerdiş persayî. Metnê eşkerayîye hetê Îkbal Eren ra ame wendiş.&nbsp;

	&nbsp;

	Îkbal Eren, dîyar kerd ke Mehmet Salîm Acar, taxa Ambarî ya Bismîlê Amedî de ciwîyeno û citkarî kerdêne û wina va: "20ê Tebaxa 1994ine de, wexto ke lajê xo yê 13 serrî dir zîyan de şuxilyayîne, çend kesê bi wesayîtê torosî ameyî bi zor Mehmet Salîm Acar wesayîtî rê espar kerdî. Kêna û cîranê ey wexto ke çem de cilî şûtîne, vînayî ke mîyanê wesayîtî de çim û fekê ey ameyo padayîş. Keyeyo ke zana wesayît verê xo dayo Tabûrê Cendermeyan ê Bîsmîlî muracatê dezgehê fermî dayî. Waştişname dayî Serekkomarî, Wezaretê Edaletî, Wezaretê Karê Zerreyî û Wezaretê Heqê Merdiman. Waştişê pawitişê cuya ey kerdî.

	&nbsp;

	Pêwa hewldayîşan zî tu agahî nêame girewtiş. Muracatê hukmedî zî cewabêk nêame dayîş û keye muracatê Dezgehê Heqê Merdiman ê Ewropa (DMME) kerd. DMME, 8ê Nîsana serra 2004ine de bi sebebo ke berpirsîyarîyê hukmî bi ca nêardo, qerarê îhlalkerdişê heqan da.&nbsp;

	&nbsp;

	Çend serrî derbaz benê wa bibê ma do ancî aqûbetê Mehmet Salîm Acar û pêro vînîbîyayeyê bînan bipersê, ma do waştişê caardişê edaletî bikerê. Ganî dewlete goreyê formê huqûqê gerdûnî têbigêro."

	&nbsp;

	Çalakî dimayê ronayîşê qerenfîlan peynî bî.

	&nbsp;

	&nbsp;

	

	&nbsp;