Bazarê taxe de: Her çî vay o 2025-06-02 11:53:27     Neslihan Kardaş-Memihan Zeydan   WAN - Cinîyê ke vernîya roşanî şî bazarê taxe wina vatî: “Ma nêeşkenê lazimîyanê xo bigîrê. Her çî vay o.”   Welat de krîzê ekonomî her ke şino giran beno û hêzê girewtişî her ke şino keweno. Krîzî dir standardê cuya welatijan zî vuryena. Ver bi roşanê qurbanî de welatiyê ke şinê sûke, nêeşkenê çîyêk bigîrê. Krîz de yê ke tewr zêde tesîr benê cinî yê û dîyar kenê ke semedê goreyê hêzê xo çîyêk bigîrê seranserê bazarî de gêrenê.   Cinîyê bazarê taxa Karşiyaka yê Rêya Armûşî ya Wanî derheqê krîzî de qisey kerdî.   ‘Bi qaso ke hêzê ma qîm bikero’   Rabîa Maral dîyar kerd ke vayî vuryena û va: “Ma baş wey nêbenê. Tutê ma baş wey nêbenê. Bi qaso ke hêzê ma qîm bikero, ma eşkenê bigîrê. Hêzê ma qîm nêkeno. Her çî vay o. Ma nêeşkenê qurban bigîrê.”   ‘Her çî vay o’   Ozlem Şahîn zî wina va: “Her çî vay o. Krîz her ke şino giran beno. Çar tutê mi est ê. Tutî fêkî wazenê ma nêeşkenê bigîrê. Çar tutê mi est ê. Mi semedê roşanî tu çîyêk nêgirewto. Verê rûn 100 TL bî. Nika 300 TL yo. 5 lître rûn 15-20 rojan şino. Şertê cuye zehmet ê. Ma nêeşkenê semedê roşanî qurban zî bigîrê.”   ‘Ma nê roşanî de nêeşkenê qurban bigîrê’   Zerîfe Gur zî wina va: “Welat de krîzêk est o. Ma hîn çîyan gênê, hîn çîyan nêgînê. Mi çîyêk bazar ra nêgirewt. Verê vayî erjan bî. Nika her çî vay o. Roşan nêzdî yo. Ma tu çîyêk nêgirewto. Lajê mi Îşkurî ser o kar vîneno, dimayê 6 aşman betal maneno. Ma nê roşanî de nêeşkenê qurban bigîrê.”   ‘Yê ke şuxilênê nêeşkenê debare bikerê, yê ke nêşuxilênê do senî bikerê?’   Alya Taşkulak wina reaksîyon mojna: “Ma bi meaşê teqawîtbîyaye debare kenê. Ça ancax îdare kenê. Ma nêeşkenê lazimîyê xo bigîrê. Ma bi hezar lîra yenê bazar la satilê ma pirr nêbeno. Roşan yeno. Ma qurban nêdanê. Meaşê ma 14 hezar o. Qîm nêkeno. Krîz roj bi roje pîl beno. Yê ke xebityenê debarê nêkenê, yê ke nêxebityenê do senî bikerê?”   ‘Semedê qurbanî 14 hezar’   Nîhayet Aslan zî va nêeşkenê lazimîyê xo bigîrê û wina va: “Mi tena hende çî girewtî. Vay o ma nêeşkenê bigîrê. Çîyêk erjan çin o. Ez û hîrê kênayê xo yê. Semedê qurbanî zî ma 14 hezar da.”