NAVENDA NÛÇEYAN-- Rêxistina  DEM Partiyê ku tayînkirina qeyûm li ser Şaredariya Bajarê Mizin a Wanê şermezar kir, Peyama em ê teqez bi ser bikevin da.

 

Rêxistina Partiya Wekhevî û Demokrasiyê (DEM Partî) der barê qeyûmê tayînî Şaredariya Bajarê Mezin a Wanê  de li ber avahiya partiye ya Qersê daxuyaniyek da çapemeniyê. Rêveberiyên bajar û navçeyan ên  DEM Partiyê beşdarî daxuyaniyê bûn. Rêveberê  DEM Partiyê Resûl Kambay daxuyanî xwend.

 

Resûl Kambay bi bîr xist ku duh danê sibê qeyûm li Şaredariya Bajarê Mezin a Wanê hat tayînkirin û wiha got: “Di vê dema ku hêviya aştiyê di nava gelê me de geş dibe, şaredariya me bi operasyoneke siyasî hatiye dagirkirin. Bi bombeyên gazê û guleyên plastîk êrîşî şaredariya me kirin. Li zêdeyî 100 welatiyên me lêdan hat kirin û hatin binçavkirin. Desteserkirina Şaredariya me ya Bajarê Mezin a Wanê ne tenê derbeyek li vîna gel e, di heman demê  di zarardayîna aştıyê de israr e."

 

'Em ê teqez bi ser bikevin'

 

Resûl Kambay da zanîn ku  DEM Partiyê hilgirê kevneşopiyeke siyasî ye ku armanca wê di her şert û mercî de parastina îradeya gel û parastin û berfirehkirina destkeftiyên gelê me ye û wiha got: “Dîroka me bi têkoşîna bindestan a li dijî zilma zaliman hat avakirin. Şert û merc çi dibin bila bibin, îro û sibe jî wê ev berxwedana bi rûmet hebe. Em ê nehêlin îradeya gel bi operasyonên siyasî û berfirehkirina polîtîkayên kaotîk bi rawestandina hiqûqê bê girtin. Bi gelê xwe re duh li Wanê me li ber xwe da û em bi ser ketin, îro jî em ê li ber xwe bidin û bi ser bikevin. Em ê hem aştiyê hem jî vîna xwe biparêzin! “Em ê bi ser bikevin, teqez em ê bi ser bikevin.

 

Piştre daxuyanî bi dawî bû.