Li Qamişlo û Hesekê agirê Newrozê geş bû 

2026-03-17 15:06:38


	 

	NAVENDA NÛÇEYAN -TEV-DEM'ê û Rêveberiya Perwerdeyê ya Qamişloyê agirê Newrozê dadan. Li Hesekê jî bi tevlibûneke girseyî Newroz hat pîrozkirin.

	 

	Rêveberiya Dibistanan a bajarê Qamişloyê, bi boneya nêzîkbûna 21'ê Adarê, çalakiyek li dar xist û agirê Newroz dada. Li Hesekê jî di pîrozbahiya Nwrozê de beşdaran bal kişandin ser girîngiya Newrozê ji bo gelê Kurd. 

	 

	Di pîroz bahiya Nwrozê ya Qanişloyê de,Mamoste û malbatên Şehîdan bi cil û bergên xwe yên Kurdî beşdarî çalakiyê bûn. Cihê çalakiyê jî bi al û sembolên Kurdî hat xemilandin.

	 

	Beriya ku meşaleya Newrozê were pêxistin, hevserokê Meclisa Malbatên Şehîdan a bajarê Qamişloyê Ubeyd Etê axivî. Ubeyd Etê di axaftina xwe bal kişand ser berxwedana gelê Kurd a di 21'ê Adarê de û çawa li zulmê rizgar bûn.

	 

	Piştre meşaleya Newrozê hat pêxxistin û li ber stranên şoreşgerî û gelêrî yên Kurdî govend hatin gerandin.

	 

	Endamên Tevgera Civaka Demokratîk (TEV-DEM) jî li pêşiya avahiya xwe ya li bajarê Qamişloyê agirê Newrozê pêxistin û li dora agir govend gerandin.

	 

	Hesekê

	 

	Meclisa Bajarê Hesekê îro çalakiya pêxistina agirê Newrozê, li dar xist. Endamên meclisê, nûnerên partiyên siyasî û tevgerên civakî, her wiha rayedarên hikûmeta demkî beşdarî çalakiyê bûn.

	 

	Çalakî bi deqeyek rêzgirtinê dest pê kir, piştre hevserokê meclisa bajêr Farûq Tozo axivî û diyar kir ku Newroz destpêkek nû, ji nû ve jidayikbûna jiyanê û bidawîkirina neheqiyê ye. Tozo bal kişand ser sembobûna Newrozê ya dîrokî ji bo gelê Kurd û têkoşîna berdewam a ji bo domandina agirê Newrozê .

	 

	Tozo diyar kir ku pîrozkirina Newrozê tê wateya xurtkirina nirxên azadî û nûjenkirinê û girêdana wan a bi nasnameya wan a çandî û yekitiya civakî nîşan dide.

	 

	Piştî axaftinê agirê Newrozê dadan. Çalakiyên pîrozbahiya Newrozê dê heta 21`ê Adarê dewam bikin.