Têkoşer Şîlan Kobanê û hevrêyên wê hatin bibîranîn 2025-11-29 15:55:26   NAVENDA NÛÇEYAN - Di 29’ê Mijdara 2004’an de endama komîteya navendî ya PYD’ê Şîlan Kobanê û 4 hevalên xwe Ciwan, Cemîl, Zekeriya û Fûad di encama komployekê de li Mûslilê hatin qetilkirin. Bi bê wesîleyê li gelek navendên Bakur û Rojhilatê Sûriyê, çalakiyên bîranînê hatin lidarxistin.   Endama Komîteya Navendî ya Partiya Yekitiya Demokratîk (PYD) Şîlan Kobanê (Meysa Baqî) û hevrêyên wê Zekeriya Îbrahîm, Hîkmet Tokmak (Fûad), Nebo Elî (Cemîl) û Hacî Cuma Elî (Ciwan) 29’ê Mijdara 2004’an bi komployeke rejîma Baasê û dewleta Tirk a dagirker li bajarê Mûsilê yê Iraqê hatin qetilkirin.    Qamişlo    Li bajarê Qamişloyê semînerek ji aliyê PYD’ê ve hate dayîn. Semîner li navenda PYD`ê ya li bajêr bi beşdariya bi sedan şêniyan, nûnerên saziyên Rêveberiya Xweser û civaka sivîl hate dayîn. Di semînerê de Şîlan Kobanê û hevreyên xwe Zekeriya Îbrahîm, Hîkmet Tokmak, Nebo Elî û Hacî Cuma Elî hatin bibîranîn û hate diyarkirin ku wan ji bo gelê xwe di asta fedaîtiyê de gelek xebat dane meşandin û di oxira vê rêyê de gihaştin şehadetê.   Hate destnîşankirin ku li dijî şehîd Şîlan Kobanê gelek caran hewildanên suiqestkirinê hatine kirin. Her wiha hate gotin, di demekê de ku Tevgera Azadiyê di pêvajoyeke hesas re derbas dibû, Şîlan Kobanê yek ji hevalên bi biryardarî li hemberî hewildanên tesfiyekaran sekinî.   Hate diyarkirin ku Şîlan Kobanê xwedî sekneke fedekar û bi berpirsyar bû, ji ber hêzên komploger dizanin jineke mîna wê dê bi îradeyeke xurt bi erka xwe rabe, ew û hevalên wê hedef girtin.   Di semînerê de hate zanîn ku şehîd Şîlan encamgir bû, di her demê de xebatên zehmet hildibjart, di pêvajoya avakirina artêşbûna jin de ya di nava Tevgera Azadiyê de cih girt, xebatên çand û huner, nivîskarî û rewşenbîriyê jî kir.   Semîner bi axaftina der barê salvegerê de bi dawî bû.   Girkê Legê    Li hola Sendîkaya Karkeran a bajarokê Rimêlanê yê kantona Cizîrê bi beşdariya şêniyan, endamên saziyên sivîl û leşkerî civînek hat lidarxistin.   Civînê bi rêzgirtinê dest pê kir. Piştre hevserokê Meclisa PYD’ê ya bajarê Girkê Legê Idrîs Mele Şerîf têkoşîna Şîlan Kobanê û hevreyên wê ya ji bo rêxistinkirina civakê vegot.   Idrîs Mele Şerîf anî ziman ku şehîd Şîlan Kobanê û hevrêyên wê bi baweriya kûr a bi nirxên azadî û edaletê berpirsyariya parastina civakê hilgirtin û têkoşîna wan bingeha manewî ya sekna civakê ye.   Di dawiya civînê de banga parastina nirxên şehîdan hat kirin.   Til Temir    Li bajarê Til Temirê jî merasîma bîranîna şehîd Şîlan Kobanê û hevrêyên wê bi beşdariya girseyek mezin a şêniyan, malbatên şehîdan, endamên saziyên civaka sivîl û nûnerên partiyên siyasî hat lidarxistin.   Merasîma bîranînê li hola Meclisa Malbatên Şehîdan a Til Temirê bi rêzgirtinê dest pê kir. Hevseroka Meclisa PYD’ê ya Til Temirê Ronaz Yûsif behsa ked û têkoşîna şehîd Şîlan û hevrêyên wê kir û got "Şehadeta hevrê Şîlan bû destpêka pêvajoyeke nû ya têkoşîn û berpirsyariya li hemberî nirxên azadî û demokrasiyê."   Merasîm bi berzkirina dirûşmên dilsoziya bi şehîdan re bi dawî bû.   Amûdê    Meclisa Jinan a PYD’ê ya bajarê Amûdê ji bo bîranîna şehîd Şîlan Kobanê û hevrêyên wê merasîmek li dar xist. Endamên saziyên civaka sivîl, Hêzên Ewlekariya Hundirîn-Jin û Meclisa Jinan a PYD’ê beşdarî bîranînê bûn.   Berdevka Meclisa Jinan Netewî Xemgîn axivî û bal kişand ser rola şehîd Şîlan û hevrêyên wê di pêşxistina xebatên partiyê û berxwedana wan a li hemberî siyasetên pergala desthilatdar.   Netewî Xemgîn diyar kir k şehîd Şîlan û hevrêyên wê damezrînerên partiyê bûn.   Her wiha anî ziman ku divê Sûriyeyeke demokratîk a nenavendî were avakirin ku mafên tevahî pêkhateyan, bi taybetî yên jinan mîsoger bike û hevgirtina nîştimanî pêş bixe.   Di dawiyê de stran û helbest hatin gortin  û sînevîzyonek li ser têkoşîna şehîd Şîlan Kobanê hat pêşandan.   Dêrik    Meclisa PYD’ê ya bajarê Dêrikê jî bi beşdariya şêniyên bajar û endamên saziyên sivîl civînek li Navenda Çand û Hunerê ya Dîcleyê li dar xist.   Di civînê de piştî rêzgirtinê, endama Meclisa Malbatên Şehîdan a Dêrikê Gulîstan Osman axivî û rêwîtiya têkoşînê ya şehîd Şîlan û hevrêyên wê vegot. Gulîstan diyar kir şehîd Şîlan di temenekî biçûk de tev li berxwedanê bû û her tim piştgirî dida jinan.   Gulîstanê desnîşan kir ku ew bi saya keda şehîdên mîna Şîlan û hevrêyên wê li ser axa xwe dijîn û dê xeta şehîdan bişopînin.   Piştre sînevîzyonek li ser jiyana şehîd Şîlan Kobanê û têkoşînê wê û reportaja bi dayika wê re hat pêşandan.   Bîranîn bi berzkirina "Jin, Jiyan, Azadî" û "Şehîd Namirin" bi dawî bû.   Kobanê    Meclîsa Jinan a PYD’ê ya Kantona Firatê bi heman munasebetê civînek li dar xist. Civîn bi beşdariya malbat û hevrêyên şehîdan, endamên PYD'ê û bi sedan kesî li hola PYD'ê ya li bajarê Kobanê hat lidarxistin.   Civîn bi deqeyeke rêzgirtin dest pê kir. Piştre ji rêveberên Meclisa Jinan a PYD`ê ya Bakur û Rojhilatê Sûriyê Horiye Şemdîn sersaxî ji malbata şehîdan re xwest û soza domandina rêya şehîdan da.   Horiye Şemdîn got: "Şehîd Şîlan bû sembolek û bû pêneşenga tevahî jinan.  Divê em xwedî li têkoşîn û berxwedana wê derkevin û xeta wê bişopînin."   Hevserokê PYD’ê Xerîb Xiso di destpêka axaftina xwe de 27’ê Mijdarê salvegera 47’an a damezirandina PKK’ê (Cejna Berxwedana Neteweyî) li gelê Kurdistanê û Rêber Abdullah Ocalan pîroz kir û şehîdên têkoşîna azadiyê bi bîr anîn.   Hiso bi domdarî got: "Şehîdan xeta azadiyê nîşan me dan û bi saya wan em gihaştine vê asê. Divê em xeta xwe ya têkoşîna xurtir û Rêber Apo bi fîzîkî azad bikin. Em soz didin ku em ê xewn û xeyalên şehîdan pêk bînin û şopdarên rêya wan bin."   Piştre li ser navê malbata şehîd Şîlan û malbata şehîd Cemîl axaftin hatin kirin. Di axaftinan de hate gotin, ew bi şehîdên xwe serbilind in û ew ê heta dawiyê şopdarên rêya wan bin û xeyalên wan bi cih bînin.   Piştre sînezîsyonek li ser têkoşîna şehîd Şîlan û hevrêyên wê hat pêşandan.   Civîn bi dirûşmên "Şehîd namirin","Bê serok jiyan nabe" û "Jin Jiyan Azadî" bi dawî bû.