'Êdî bes e, em azadiyê dixwazin' 

2025-09-18 09:05:48


	 

	AMED - Jinên ku ji bo mafê hêviyê meşiyan, daxwaza azadiya fizîkî ya Rêberê Gelê Kurd Abdullah Ocalan kirin.

	 

	Platforma Saziyên Demokratîk, li Amedê ji bo balê bikşîne ser “mafê hêviyê” yê Rêberê Gelê Kurd Abdullah Ocalan, bi dirûşmeya “Em ji bo mafê hêviyê yê Rêberê Gelan ber bi azadiyê ve dimeşin” meşek li dar xist. 

	 

	Jinên ku beşdarî meşê bûn nêrînên xwe ji ajansa me JINNEWS'ê re anîn ziman.

	 

	'Em bi Rêberê xwe bawer in'

	 

	Muşeyyer Ulker: Di 27ê Sibatê de, Rêberê Gelê Kurd Abdullah Ocalan banga civatek demokratîk û aştiyê kir û em jî bûn dengê aşitiyê. Em aştiyê dixwazin; divê her kes gavên xwe bavêje. Her ku ew Gelê Kurd paşguh bikin, têkoşîna me jî ewqas mezin dibe. Mîna ku agir di dilê wan de pêxistibe, Rêber ji wan re got ku vê pêvajoya aştiyê hembêz bikin. Çend meh in, ji aliyê din ve tu gav nehatiye avêtin û wan peyvek jî nebihîstiye. Pêvajoya aştiyê dilê me mîna hêviyê tijî kiriye. Çirûskek hêviyê heye ku pêvajoya aştiyê dê pêk were. Ez ji aliyê din bawer nakim, lê ez ji Rêber bawer dikim. Baweriya min bi vê têkoşînê heye. Baweriya min bi têkoşîna ku 50 sal in didome heye. Lê îro, baweriya min bi wan kesên ku ditirsin û nikarin gavekê bavêjin tune.

	 

	

	 

	'Divê rêberê me azad bibe'

	 

	Nafîa Yîgît: Em dibêjin êdî bes e. Divê her kes bibe yek, destên hev bigirin û ber bi aştiyê ve gavan bavêjin. Em jî mîna her kesî azadiyê dixwazin. Em daxwaza bidawîanîna tecrîda li ser Rêberê Gelê Kurd Abdullah Ocalan dikin; em daxwaza serbestberdana wî dikin. Îro bangek ji Parlamentoyê re hat kirin; divê her kes banga xwe qebûl bike. Em bang li dewletê dikin: Bila destê xwe dirêjî azadiyê bikin. Em ê têkoşîna xwe bidomînin heta ku azadî bigihîje van axan. Em ê destê xwe dirêjî azadiyê bikin heta ku Rêberê Kurd azad bibe. Em bang li her kesî dikin ku pêvajoya aştiyê bidomîne.

	 

	'Em ê li Sûrê li dora Rêberê xwe bicivin'

	 

	Saygul Gerîcî: Konseya Ewropayê civiya û em jî ji bo azadiya fîzîkî ya Rêberê Gelê Kurd Abdullah Ocalan li ber xwe didin. Bi îzna Xwedê ew ê azad bibe. Ez pir bi heyecan im. Rojekê ew ê hilkişe ser sûrên Amed û em ê li dora wî bicivin. Û em dixwazin wî bibînin. Birayê min di girtîgehê de ye; niha hezar 700 sal cezayê girtîgehê lê hatiye birîn. Ger ew rêber berdin, ew ê birayê min jî berdin.

	 

	'Aştiyeke bi rûmet dixwazin'

	 

	Medya Aydemîr: Em daxwaza berdana kesên ku behsa aştiyê dikin dikin. Ji ber vê yekê em li vir in. Ew kesên ku behsa pêvajoya aştiyê dikin di zindanê de ne; azadî bi vê yekê nayê bidestxistin. Ji bo aştiyek bi rûmet, divê Rêber azad be û bi awayekî fîzîkî azad be. Divê ew bikaribe ramanên xwe bigihîne gel.