‘PKK’ê îradeya xwe ya aştiyê nîşan da niha dora dewletê ye’

2025-07-22 09:03:12


	 

	Rozerîn Gultekîn

	           

	STENBOL - Cîgira Hevseroka Komeleya Mafên Mirovan (ÎHD) Gulseren Yolerî diyar kir ku PKK’ê îradeya xwe ya ji bo aştiyê nîşanî cîhanê daye û divê êdî gavên ber bi demokratîkbûnê ve ji aliyê dewletê ve werin avêtin. Gulseren Yolerî got, "Veguhestina berpirsiyariyê pêk hatiye."

	 

	Li ser vexwendina Rêberê Gelê Kurd Abdullah Ocalan, di 11ê Tîrmehê de li herêma Şikefta Casenê ya gundewarê Silêmaniyê ji aliyê Koma Aştî û Civaka Demokratîk ve merasîmek ji bo şewitandina çekan hat lidarxistin. Cîgira Hevseroka Komeleya Mafên Mirovan (ÎHD) Gulseren Yolerî beşdarî merasîmê bû û li ser pêvajoya pêşkeftinê û merasîmê şîrove kir.

	 

	Pêvajoyek Hêviyên Mezin dibin 

	 

	Gulseren Yoleri diyar kir ku ew di serdemek mezinbûna hêviyên ji bo aştiyê re derbas dibin, û  got, "

	 

	Beşek girîng ji civakê dixwaze ku ev pêvajo bi piştrastî bimeşe. Daxuyaniya Serokkomar bi tevahî li ser vê notê nebû, lê wê berpirsiyariyên dewletê ronî kir. Ev jî girîng e, ji ber ku bi kêmanî qebûlkirina vê yekê û bi vî rengî ji raya giştî re îfadekirin dikare fikarên li ser berdewamiya pêvajoyê kêm bike, bi kêmanî heya radeyekê. Em dikarin di warê nêzîkatiya hem dewletê û hem jî ya PKK’ê ya li ser mijarê de behsa cûdahiyên girîng ji pêvajoyên din bikin."

	 

	Prensîbên komîsyonê dê çi bin?

	 

	Gulseren Yolerî tekez kir ku her çend avêtina gavan ji bo avakirina komîsyonekê li Parlamentoyê girîng be jî, mijara sereke ya ku divê were çareserkirin cewherê karê komîsyonê ye û got, "Heke hûn rêbaza xebatê, desthilat, sînorên desthilatdariyê û erkên wê bi rêkûpêk diyar nekin, dibe ku komîsyon nikaribe gelek tiştan bi dest bixe. Em meraq dikin ka prensîbên xebatê yên komîsyonê çi ne. Ev yek, beşek ji wê, dê diyar bike ka em çi ji wê hêvî dikin. Di dawiyê de, komîsyon dê bikaribe di warên û heta radeya ku destûr lê hatiye dayîn de xebatê bike. Ji ber vê yekê, zelalkirina vê çarçoveyê piştî damezrandina komîsyonê dê diyar bike ka ev komîsyon dê di pêvajoya demokratîkbûnê de rolek krîtîk bilîze an na. Avakirina komîsyonek 'fermî' pir girîng e. Di gelek pêvajoyên aştiyê an pêvajoyên çareserkirina nakokiyan de li çaraliyê cîhanê, avakirina komîsyonek fermî di nav Parlamentoyê de pêşşertek e."

	 

	‘PKK îradeya xwe ya ji bo aştiyê nîşanî cîhanê da’

	 

	Gulseren Yolerî, ku beşdarî merasîma dîrokî ya bêçekkirinê bû, got ku her tiştê ku ji kêliya gihîştina wan a merasîmê heta kêliya bidawîbûna wê qewimî, cidiyeta ku pêvajo pê re hatiye girtin nîşan dide. Gulseren Yoleri got, "Hatina gerîlayên PKK’ê bo cihê bûyerê, mayîna wan li wir, daxuyaniyên ku di dema pêvajoyê de hatine dayîn, şewitandina çekan, û pêvajoya paşê ya çûyîna wan - ev hemû bi ciddî û profesyoneliyeke mezin hatine amadekirin, hema hema tu cîh ji bo şaşiyan nehiştiye. PKK’ê îradeya xwe ya ji bo aştiyê bi awayekî pir zelal nîşanî cîhanê da. Di nav me de dayikên ku zarokên wan an di şerê gerîla de bûn an jî jiyana xwe ji dest dabûn hebûn. Bê guman, her kes pir bi fikar bû. Bi gotineke din, fikar hebûn ka ev pêvajo dê çawa bidome."

	 

	Hestên ku serkêşiya Bese Hozat li ser jinan çêkiriye

	 

	Gulseren Yoleri diyar kir ku jin, wekî koma ku bi salan e ji bo aştî û mafên mirovan têdikoşe, tên bîra mirov, û serkêşiya merasîmê ya Bese Hozatê ev rastî dubare kir. Gulseren Yoleri got, "Wekî jinek, wekî kesayetek ku li dijî pergala serdestiya mêran rawestiya, wê gelek rûmet da me hemû jinan. Wê bi kûrahî bandor li me hemûyan kir."

	 

	‘Em di pêvajoyek wiha de nînin ku were paşguhkirin

	 

	Gulseren Yoleri wiha bi dawî kir:”Pêvajo krîtîk e. Em di pêvajoyekê wiha de nînin ku were paşguhkirin. Bo nimûne, rewşa yasayî ya 30 gerîlayên ku wê rojê li wir daxuyaniyek dan dê çawa be? Heta ev pirs niha bersivek jî tune. Divê em ji bo vê tiştekî bikin. Ez vê yekê bi baldarî tekez dikim, ji ber ku her kes ji hev tiştek hêvî dike, û me gelek caran şahidiya vê yekê kiriye. Daxwaza aştiyê hewcedarî û daxwazek hevpar a hemû civakê ye. Pêdivî ye ku ew wekî yek ji warên me yên bingehîn ên têkoşînê were nas kirin û di vê qadê de bi lez û bez xwe birêxistin bikin.”