Semra Turan-Gulistan Gulmuş

 

AMED - Parêzera Hindî Madhulika Tatigotla, ku beşdarî pîrozbahiya Cejna Newrozê ya Amedê bû, diyar kir ku Abdullah Ocalan wê matmayî hiştiye û ew rewşenbîrekî pir bi hêz e û got ku pêvajoya li vir modelek ji bo demokrasiyê ye. Siyasetmedara Swêdî Jessica Carlqvist jî got, "Ez hatim ku bi gelê Kurd re Cejna Newrozê pîroz bikim û hevgirtinê nîşan bidim. Ez ji bo Kurdistanê azadiyê dixwazim."

 

Îsal, bi dirûşma " Newroza Azadî û Yekîtîya Demokratîk", agirê Newrozê li 53 cihan hate pêxistin. Li Amedê, duh bi coşeke mezin, bi beşdarbûna bi mîlyonan ji her temenî, hate pîrozkirin. Newroz îsal bi peyama Rêberê Gelê Kurd Abdullah Ocalan hate pîrozkirin û kesên ku beşdar bûn careke din daxwazên xwe yên ji bo azadiya Abdullah Ocalan ji pîrozbahiyên Newrozê bilind kirin.

 

Kesayetên girîng ji Kurdistan, Tirkiye û gelek welatên din beşdarî Newrozê bûn. Beşdarên protokolê yên ku bi çavên xwe şahidiya heyecan, coş û peyamên girîng ên Newrozê kirin, hest û ramanên xwe bi JINNEWS'ê re parve kirin.

 

'Em ji bo aştî û edaletê dixebitin'

 

Parêzera ji Hindistanê Madhulika Tatigotla, ku hat Newrozê, diyar kir ku ew bi gelek rêxistinên civaka sivîl ên li Hindistanê re dixebite û got, "Di sê salên dawî de, nemaze piştî qirkirina Îsraîlê ya li Xezeyê, lê niha jî dema ku em li pêvajoyên din ên emperyalîst ên li cîhanê dinêrin, me komek bi navê 'Bangalore ji bo Aştî û Edaletê' anî cem hev ku em hewl didin ji bo kesên di van bûyerên li Hindistanê de beşdar in hevgirtinê biafirînin."

 

'Bihevrebûn balkêş e'

 

Madhulika Tatigotla sedemên beşdarbûna xwe ya di Cejna Newrozê de û hestên xwe anî ziman û got, "Li çaraliyê cîhanê jin ji bo heman tiştî têkoşînê dikin û ez difikirim ku hatina me ya vir nîşanek e ku jinên Kurd ji bo çi têkoşînê dikin û hatina jinên Kurd ji bo Hindistanê nîşanek e ku jinên Hindî ji bo çi têkoşînê dikin. Ji ber vê yekê, dîtina me hemûyan ku em bi hev re tevgerekê ava dikin min pir kelecanî dike."

 

'Pêvajoya li vir modelek ji bo demokrasiyê ye'

 

Madhulika Tatigotla, li ser ramanên Rêberê Gelê Kurd Abdullah Ocalan û xalên ku bandor li wê kirine wiha got, "Perspektîfa wî ya li ser nîqaşên heyî yên di derbarê antî-emperyalîzmê de her tim bala min kişandiye. Ji ber ku me her tim antî-emperyalîzm wekî tiştek ku tenê dewletek, mînak dewletek neteweyî, dikare bike, difikirî. Û ez difikirim ku tiştê Ocalan nîşanî me dide ev e ku ne hewce ye em di nav van sînor û ramanên dewletê yên hişk de asê bimînin û ya girîng demokratîkbûna ji hundirê civakê ye. Demokrasî li hemî sînoran û li her derê dest pê dike. Ez difikirim ku ev fikrek pir bi hêz e û pêvajoya aştiyê ya li vir dê modelek ji bo demokrasiyê be."

 

'Hevgirtina di navbera gelan de balkêş e'

 

Madhulika Tatigotla bal kişand ser têgeha azadiyê her wiha dirûşma Cejna Newrozê û got, "Azadî li her derê yek e û ez difikirim ku ew dersek e di warê azadiya tevgerê û heta di ekolojî û demokrasiyê de. Û ez difikirim ku bi rastî jî balkêş e ku hevgirtin êdî ne di navbera dewletan de, lê di navbera mirovan de were damezrandin. Hatina me ya vir gavek di vî alî de ye."

 

Siyasetmedara Swêdî: Ez ji bo Kurdistanê azadiyê dixwazim

 

Siyasetmedar û çalakvana Swêdî Jessica Carlqvist, diyar kir ku ev cara yekem e beşdarî pîrozbahiya Cejna Newroza Amedê dibe û got, "Beşdarbûna li Cejna Newrozê pir bi kelecan e, em wekî rojek pir mezin hîs dike. Ez hatim vir da ku di vê roja girîng de bi gelê Kurd re Cejna Newrozê pîroz bikim û bi wan re di nav hevgirtinê de bim. Ez ji bo hemû Kurdistanê, bi taybetî jî ji bo jinên Kurd azadiyê dixwazim."